Qazaqstan ekonomikasynyń barlyq salasynda jaqsy qarqyn baiqalady. Bul týraly búgin Úkimettiń keńeitilgen quramdaǵy otyrysynda Elbasy Nursultan Nazarbaev aitty, dep habarlaidy "Ult aqparat".
«Jalpy 2018 jyldyń kórsetkishteri ekonomikanyń barlyq salasynda jaqsy dep aitýǵa bolady. Sonyń arqasynda halyqqa áleýmettik qyzmet kórsetetindei jaǵdai boldy. Atap aitsaq, ekonomikanyń ósimi 4 paiyzdan asty. Bul jalpy dúniejúzilik ortasha ósimnen joǵary. Negizinen saýdada 7,6, kólikte 4,5, ónerkásipte 4 paiyzdan astam ósim bar», - dedi Nursultan Nazarbaev.
Elbasy el ekonomikasynyń basqa da salalarynda jaqsy qarqyn baiqalatyndyǵyn atap ótti.
«Infliatsiianyń ótken jylǵy kórsetkishi 5,3 paiyzdy qurady. Solai dep josparlanǵan edik. Negizgi kapitalǵa salynǵan investitsiialar 17 paiyzdan asty. Bul da jaqsy kórsetkish dep aitýǵa bolady. Atalǵan ekonomikalyq kórsetkishterdiń barlyǵy halyq turmysyn jaqsaryp, naqty tabysynyń artýyna óziniń úlesin tigizedi», - dedi Nursultan Nazarbaev.
Memleket basshysy keshe 5 oblys ákimimen kezdeskenin eske salyp ótti.
«Esepterin tyńdadyq. Óńirlerde de istelip jatqan sharýa az emes. Barlyǵy bizdiń baǵdarlamalardy oryndaý úshin atsalysyp, jumys istep jatyr», - dedi Elbasy.
.jpeg)