Qazaqstan Prezidenti Nursultan Nazarbaevtyń tóraǵalyǵymen Birikken Ulttar Uiymy Qaýipsizdik Keńesiniń «Jappai qyryp-joiatyn qarýdy taratpaý: senim sharalary» atty otyrysy ótti, dep habarlaidy "Ult aqparat" Aqordaǵa silteme jasap.
Jiyndy ashqan Memleket basshysy otyrysqa qatysqany úshin Birikken Ulttar Uiymynyń Bas hatshysy A.Gýterrishke, Polsha Respýblikasynyń Prezidenti A.Dýdaǵa jáne BUU Qaýipsizdik Keńesine múshe basqa da elderdiń delegatsiia basshylaryna rizashylyq bildirdi.
– Múmkindikti paidalana otyryp, Prezident Dýdany Polshanyń Birikken Ulttar Uiymy Qaýipsizdik Keńesiniń turaqty emes múshesi retindegi qyzmetiniń bastalýymen quttyqtaimyn. Sonymen birge, Kot-d’Ivýar, Kýveit, Perý jáne Ekvatorlyq Gvineiany da biyl Qaýipsizdik Keńesiniń turaqty emes múshesi bolýymen quttyqtaimyn. Jahandyq uiymnyń osy mańyzdy organy aiasynda yntymaqtastyq pen yqpaldastyq tanytyp, birlese jemisti jumys isteimiz dep úmittenemin, – dedi Qazaqstan Prezidenti.
Nursultan Nazarbaev bekitilgen kún tártibine sáikes, sózdi BUU-nyń Bas hatshysy A.Gýterrishke berdi.
A.Gýterrishtiń baiandamasynan keiin Memleket basshysy Keńes múshelerine arnap málimdeme jasady.
– Biz Qazaqstannyń Birikken Ulttar Uiymy Qaýipsizdik Keńesiniń turaqty emes múshesi bolyp sailanýyn jáne búgingi tóraǵalyq qyzmetimizdi álemdik qoǵamdastyqtyń elimizge jáne onyń beibitshil saiasatyna degen senimi dep bilemiz. Bul mártebeli qyzmettegi Ortalyq Aziianyń birinshi memleketi bola otyryp, biz Dúniejúzilik uiymnyń bul mańyzdy organyndaǵy óńir halyqtarynyń «únine» ainaldyq, – dedi Qazaqstan Prezidenti.
Nursultan Nazarbaev Qazaqstannyń BUU Qaýipsizdik Keńesi jumysyna ótken jylǵy qosqan úlesin atap ótti.
– Aýǵanstan/«Taliban», ILIM/DAISh, «ál-Kaida» jáne Somali/Eritreia jónindegi komitetterdi basqara otyryp, olardyń jemisti qyzmet etýine óz úlesimizdi qosyp kelemiz. Keńestiń barlyq múshe-memleketterine berik yntymaqtastyǵy úshin rizashylyǵymdy bildiremin, – dedi Memleket basshysy.
Qazaqstan Prezidenti beibitshilik pen qaýipsizdikke qol jetkizý jolyndaǵy senim sharalary shielenistiń aldyn alý jáne mańyzdy jahandyq problemalardy sheshý kezinde negizgi ról atqaratynyn aitty.
– Men Birikken Ulttar Uiymy Bas Assambleiasynyń 47-shi sessiiasynyń minberinen Aziiadaǵy qaýipsizdik jáne senim sharalary jónindegi óńirlik qurylym qurý týraly usynys aitqan bolatynmyn. Tynymsyz diplomatiialyq jumystyń nátijesinde bul mehanizmdi qurýǵa qol jetkizildi. Búginde Aziiadaǵy ózara yqpaldastyq jáne senim sharalary keńesi óńirdegi 26 memleketti biriktirip, tabysty jumys isteýde. Shirek ǵasyrdan keiin taǵy da Birikken Ulttar Uiymynda Qaýipsizdik Keńesiniń turaqty emes múshesi retinde Qazaqstannyń atynan sóz sóilep turmyn, – dedi Nursultan Nazarbaev.
Memleket basshysy senim sharalaryn kún tártibinen túsirmeý qajettigin aityp, buǵan yqpal etetin birneshe faktordy atap ótti.
Qazaqstan Prezidenti Iadrolyq qarýdy taratpaý týraly shartqa negizdelgen qarýdy taratpaý rejimin nyǵaitý máselesinde tereń mentaldi ózgerister men kópjaqty jańa saiasi sheshimder qajet ekenin aitty.
Osyǵan bailanysty Nursultan Nazarbaev qarýdy taratpaý salasyndaǵy senimdi nyǵaita túsýge baǵyttalǵan birqatar sharalardy usyndy.
Sońynda Memleket basshysy qaqtyǵystardy tiimdi sheshý úshin álemdik iadrolyq derjavalar arasynda ózara túsinistik pen ózara senim ornatýdyń mańyzdylyǵyna nazar aýdardy.
– Álemdik qoǵamdastyq – alýan túrli jáne kóp qyrly sipaty arqyly kúsheie túsken birtutas organizm. Ol jer betindegi ulttar men halyqtar arasynda teńgerim men úilesim bolǵan kezde ǵana alǵa basyp, dami alady. Sol sebepti, biz quqyq ústemdigine negizdelgen qaýipsiz álem men ádiletti álemdik tártipke birlese qol jetkizýimiz kerek. Bul iste Birikken Ulttar Uiymy Qaýipsizdik Keńesiniń róli zor jáne oǵan tarihi missiia júkteletini de sózsiz, – dedi Qazaqstan Prezidenti.
Sondai-aq, Keńes otyrysy barysynda Polsha Prezidenti A.Dýda, Kýveit Premer-Ministriniń orynbasary – Syrtqy ister ministri Sheih Sabah Haled Ál-Sabah jáne Resei Federatsiiasynyń Syrtqy ister ministri S.Lavrov sóz sóiledi.
