Máskeýdiń Tver aýdandyq soty juma kúni 23 qańtarda ótken oppozitsiialyq saiasatker Aleksei Navalnyidy qoldaý sharasyna qatysty «sanitarlyq is» boiynsha ustalǵandardyń barlyǵyn úiqamaqqa jiberý jóninde sheshim shyǵardy.
Navalnyi basqaratyn «Jemqorlyqpen kúres qorynyń» zańgeri Liýbov Sobol, oppozitsionerdiń baýyry Oleg Navalnyi, saiasatkerdiń Máskeýdegi shtabynyń úilestirýshisi Oleg Stepanov, Pussy Riot tobynyń múshesi Mariia Alehina, «Dárigerler aliansy» kásipodaǵynyń basshysy Anastasiia Vasileva 23 naýryzǵa deiin tutqynǵa alyndy. Olarǵa elektrondy bilezik taǵyldy. Belsendiler koronavirýs pandemiiasy kezinde engizilgen sanitarlyq-epidemiologiialyq erejelerdi buzdy dep aiyptalyp otyr.
Sot ǵimaraty mańyna jinalǵan jýrnalisterdi indet kezindegi shekteýge bailanysty otyrysqa qatystyrmady.
Tergeýshiler aiypkerlerdi bul bap boiynsha eń qatań jaza – úiqamaqqa alýdy suraǵan.
Ondaǵan myń adam qatysqan narazylyq sharasynyń erteńinde sanitarlyq normalardy buzdy degen aiyppen belsendilerdiń ústinen qylmystyq is qozǵalǵan. 27 qańtarda politsiia osy is boiynsha Aleksei Navalnyidyń 20-ǵa tarta jaqtasynyń úileri men keńselerinde tintý júrgizgen.
Tergeýshilerdiń aitýynsha, 18-23 qańtar aralyǵynda «belgisiz adamdar» áleýmettik jeli arqyly Aleksei Navalnyidy qoldaý sharasyna shaqyrǵan. Sonyń kesirinen Máskeý ortalyǵyna kóp adam jinalǵan. Koronavirýs indetimen kúres jónindegi jedel shtabtyń habarlaýynsha, narazylyq ótken Pýshkin alańyna Covid diagnozy qoiylǵan 19 adam kelgen.
- 23 qańtarda Reseidiń ondaǵan qalasynda Máskeýdiń «Matrosskaia tishina» tergeý izoliatoryna qamalǵan oppozitsiia lideri Aleksei Navalnyidy qoldaýshylardyń jappai mitingi ótti. Kóshege 250 myńǵa tarta adam shyqqan. 4 myńǵa jýyq demonstrant ustaldy, olardyń 1,5 myńdaiy – Máskeýde. Reseidiń tergeý komiteti narazylyqqa qatysqandardyń ústinen 30-ǵa tarta qylmystyq is qozǵady.
- Aleksei Navalnyi byltyr tamyzda «Novichok» ýymen ýlanyp, Germaniiadaǵy emhanaǵa es-tússiz kúide jetkizilgen. Biyl 17 qańtarda eline oralǵan ony tártip saqshylary Máskeý áýejaiynda qamaýǵa alǵan. Navalnyidyń ózi Resei turǵyndaryn «jemqorlyqqa qarsy» jappai narazylyqqa shyǵýǵa shaqyryp keledi. Politsiianyń qysymyna qaramastan, Navalnyi men onyń jaqtastary erteń, 31 qańtarda taǵy da jappai demonstratsiiaǵa shyǵýǵa úndep jatyr.
