مەسكەۋدٸڭ تۆەر اۋداندىق سوتى جۇما كٷنٸ 23 قاڭتاردا ٶتكەن وپپوزيتسييالىق ساياساتكەر الەكسەي ناۆالنىيدى قولداۋ شاراسىنا قاتىستى «سانيتارلىق ٸس» بويىنشا ۇستالعانداردىڭ بارلىعىن ٷيقاماققا جٸبەرۋ جٶنٸندە شەشٸم شىعاردى.
ناۆالنىي باسقاراتىن «جەمقورلىقپەن كٷرەس قورىنىڭ» زاڭگەرٸ ليۋبوۆ سوبول, وپپوزيتسيونەردٸڭ باۋىرى ولەگ ناۆالنىي, ساياساتكەردٸڭ مەسكەۋدەگٸ شتابىنىڭ ٷيلەستٸرۋشٸسٸ ولەگ ستەپانوۆ, Pussy Riot توبىنىڭ مٷشەسٸ مارييا الەحينا, «دەرٸگەرلەر اليانسى» كەسٸپوداعىنىڭ باسشىسى اناستاسييا ۆاسيلەۆا 23 ناۋرىزعا دەيٸن تۇتقىنعا الىندى. ولارعا ەلەكتروندى بٸلەزٸك تاعىلدى. بەلسەندٸلەر كوروناۆيرۋس پاندەميياسى كەزٸندە ەنگٸزٸلگەن سانيتارلىق-ەپيدەميولوگييالىق ەرەجەلەردٸ بۇزدى دەپ ايىپتالىپ وتىر.
سوت عيماراتى ماڭىنا جينالعان جۋرناليستەردٸ ٸندەت كەزٸندەگٸ شەكتەۋگە بايلانىستى وتىرىسقا قاتىستىرمادى.
تەرگەۋشٸلەر ايىپكەرلەردٸ بۇل باپ بويىنشا ەڭ قاتاڭ جازا – ٷيقاماققا الۋدى سۇراعان.
ونداعان مىڭ ادام قاتىسقان نارازىلىق شاراسىنىڭ ەرتەڭٸندە سانيتارلىق نورمالاردى بۇزدى دەگەن ايىپپەن بەلسەندٸلەردٸڭ ٷستٸنەن قىلمىستىق ٸس قوزعالعان. 27 قاڭتاردا پوليتسييا وسى ٸس بويىنشا الەكسەي ناۆالنىيدىڭ 20-عا تارتا جاقتاسىنىڭ ٷيلەرٸ مەن كەڭسەلەرٸندە تٸنتۋ جٷرگٸزگەن.
تەرگەۋشٸلەردٸڭ ايتۋىنشا, 18-23 قاڭتار ارالىعىندا «بەلگٸسٸز ادامدار» ەلەۋمەتتٸك جەلٸ ارقىلى الەكسەي ناۆالنىيدى قولداۋ شاراسىنا شاقىرعان. سونىڭ كەسٸرٸنەن مەسكەۋ ورتالىعىنا كٶپ ادام جينالعان. كوروناۆيرۋس ٸندەتٸمەن كٷرەس جٶنٸندەگٸ جەدەل شتابتىڭ حابارلاۋىنشا, نارازىلىق ٶتكەن پۋشكين الاڭىنا Covid دياگنوزى قويىلعان 19 ادام كەلگەن.
- 23 قاڭتاردا رەسەيدٸڭ ونداعان قالاسىندا مەسكەۋدٸڭ «ماتروسسكايا تيشينا» تەرگەۋ يزولياتورىنا قامالعان وپپوزيتسييا ليدەرٸ الەكسەي ناۆالنىيدى قولداۋشىلاردىڭ جاپپاي ميتينگٸ ٶتتٸ. كٶشەگە 250 مىڭعا تارتا ادام شىققان. 4 مىڭعا جۋىق دەمونسترانت ۇستالدى, ولاردىڭ 1,5 مىڭدايى – مەسكەۋدە. رەسەيدٸڭ تەرگەۋ كوميتەتٸ نارازىلىققا قاتىسقانداردىڭ ٷستٸنەن 30-عا تارتا قىلمىستىق ٸس قوزعادى.
- الەكسەي ناۆالنىي بىلتىر تامىزدا «نوۆيچوك» ۋىمەن ۋلانىپ, گەرمانيياداعى ەمحاناعا ەس-تٷسسٸز كٷيدە جەتكٸزٸلگەن. بيىل 17 قاڭتاردا ەلٸنە ورالعان ونى تەرتٸپ ساقشىلارى مەسكەۋ ەۋەجايىندا قاماۋعا العان. ناۆالنىيدىڭ ٶزٸ رەسەي تۇرعىندارىن «جەمقورلىققا قارسى» جاپپاي نارازىلىققا شىعۋعا شاقىرىپ كەلەدٸ. پوليتسييانىڭ قىسىمىنا قاراماستان, ناۆالنىي مەن ونىڭ جاقتاستارى ەرتەڭ, 31 قاڭتاردا تاعى دا جاپپاي دەمونستراتسيياعا شىعۋعا ٷندەپ جاتىر.
