Qamaýda otyrǵan reseilik oppozitsioner Aleksei Navalnyidyń jeke dárigerleri ashtyq jariialaǵan saiasatkerdiń analizin jariialady, dep habarlady BBC.
Dáriger Anastasiia Vasilevanyń sózinshe, Navalnyidyń qanynan kaliidiń shamadan tys mólsheri anyqtalǵan jáne munyń saldary aýyr bolýy múmkin, tipti júregi toqtap qalýy yqtimal.
Aleksei Navalnyi ashtyqty túrme ákimshiliginiń dárigerlerdi kirgizbei qoiýyna narazylyq retinde jariialaǵan.
Áleýmettik jelilerde Navalnyiǵa meditsinalyq kómek kórsetýge úndeý jariialanyp jatyr.
Al AQSh prezidenti Djo Baiden dárigerlerdiń eskertýinen soń Navalnyidyń jaǵdaiyn "ádiletsiz" dep atady.
"Bul tolyqtai ádiletsiz jáne qisynsyz" dedi Baiden Delaver shtatyndaǵy Ýilmington qalasyndaǵy baspasóz máslihatynda jýrnalisterge suraǵyna jaýap bere otyryp.
Birqatar Nobel syilyǵynyń laýreaty men álemge tanymal mádeniet qairatkeri Resei prezidenti Vladimir Pýtinge ashyq hat joldap, Aleksei Navalnyiǵa meditsinalyq kómek kórsetýdi surady. Hatqa barlyǵy 70 jazýshy, pýblitsist, sýretshi, ǵalym jáne mýzykant qol qoiǵan.
Qol qoiýshylar arasynda Ádebiet salasy boiynsha Nobel syilyǵynyń laýreattary Djon Kýtzee, Svetlana Aleksievich, Lýiza Gliýk, Gerta Miýller jáne Orhan Pamýk bar. Sonymen qatar úndeýge Pýlittser premiiasynyń iegeri Art Shpigelman, akterler Stiven Frai, Benedikt Kamberbetch, Devid Dýhovny, jazýshylar Tom Stoppard, Djoan Roýling jáne Maikl Kanningem qosylǵan.
- Qańtarda Máskeý soty Aleksei Navalnyidy 2014 jylǵy "Iv Roshe" isi boiynsha shartty jazanyń talabyn buzdy dep eki jyl segiz aiǵa bostandyǵynan aiyrdy. Osy úkimge bastamashyl bolǵan Resei jazany atqarýdyń federaldy qyzmeti (FSIN) Navalnyi qaida júrgeni týraly ýaqtyly baiandap turmady degen.
- Byltyr tamyzda Aleksei Navalnyi Tomskiden Máskeýeg ushyp bara jatyp esinen tanǵan. Omby aýrýhanasynda eki kún jatqannan keiin ony es-tússiz kúii Germaniiaǵa alyp ketken. Kóp uzamai Navalnyi esin jidy, al Germaniia úkimeti onyń qanynan "Novichok" ýy tabylǵanyn málimdedi.
- Jeltoqsanda Bellingcat toby birneshe táýelsiz basylymmen birlese júrgizgen zertteýin jariialap, Navalnyidy ýlaǵan FSB dedi. Artynan Navalnyidyń ózi ýlaýǵa qatysy bar FSB agenti degen adamǵa qońyraý shalyp, ol adam ýlaýǵa qatysy baryn abaisyz rastap qoiǵan.
- Máskeý bul aiyptyń bárin moiyndamaidy.
