Qamaýdaǵy oppozitsiialyq saiasatker, biliktiń jemqorlyq áreketterin áshkerelep júrgen belsendi Aleksei Navalnyidyń áieli Iýliia Navalnaia belgisiz sebeptermen Germaniiaǵa ushyp ketken. Saiasatkerdiń áieli 10 aqpanda Máskeýdegi Domodedovo áýejaiynan ushyp, sársenbi keshke Frankfýrtqa jetken. Nemistiń Deutsche Welle agenttigi onyń áýejaidyń tranzit aimaǵynan shyqpaǵanyn habarlady, biraq Lufthansa jolaýshylary Navalnaianyń reiste bolǵanyn rastaǵan.
Buǵan deiin reseilik "Interfaks" agenttigi jeke derekkózine súiene otyryp, Navalnaianyń Germaniiaǵa ushyp ketkenin habarlaǵan. Navalnaianyń zańgeri Svetlana Davydova TASS agenttigine Navalnaianyń ushyp ketkeni jaily aqparatty estimegenin aitqan.
Iýliia Navalnaia jaqynda kúieýin bosatýdy talap etip, ruqsat etilmegen mitingige qatysqany úshin ustalyp, bosatylǵan. Navalnyidyń jaqtastaryna bilik qysymy údegen shaqta onyń basqa elge ushýy "saiasatkerdiń áieli qaýipsizdigi úshin alańdap, elden ketti" degen sybystyń taraýyna túrtki boldy. Nemistiń Der Spiegel jýrnaly derekkózge súiene otyryp, Navalnaia "jeke sharýalarymen" Germaniiaǵa ushyp keldi dep jazǵan. Degenmen basylym jai-japsaryna toqtalmaǵan.
