Máskeýde oppozitsiialyq saiasatker Aleksei Navalnyi qamaýda otyrǵan tergeý izoliatorynyń profilaktika komissiiasy ony qashyp ketýge beiimi barlar esebine qoidy. Bul týraly saiasatkerdiń ózi Instagram-da málimdedi.
Navalnyidyń sózinshe, bul shara qańtarda jaryq kórgen zertteýi úshin qysym kórsetý retinde qabyldanyp otyr. Youtube jelisinde jaryq kórgen zertteý filmi Resei prezidenti Vladimir Pýtinge tiesili degen "saraiǵa" arnalǵan.
Oppozitsioner ózinen komissiianyń sheshimimen tanysqany jónindegi qaǵazǵa qol qoiýdy talap etkenin málimdedi.
- 2 aqpan kúni Máskeý soty Aleksei Navalnyidy 2014 jylǵy alaiaqtyq jóninde shartty jaza úkimi boiynsha 2 jyl 8 ai túrme jazasyna kesti. 2017 jyly Eýropanyń adam quqyqtary jónindegi soty oppozitsionerdi sottaýǵa ilik bolǵan "Iv Roshe" isin zańsyz dep taýyp, onyń sottalýy Navalnyidyń ádil sotqa degen quqyǵyn buzdy dep málimdedi. Oǵan tipti ótemaqy da tólengen. Biraq Resei joǵarǵy soty úkimdi zańdy dep tanyp, ony ózgertýden bas tartqan.
- Batys elderi Navalnyidyń qylmystyq qýdalanýyn aiyptaidy. Olar Resei biliginen onyń ýlanýyn tergeýdi de talap etti. Sotqa kemi 10 memlekettiń diplomatiialyq missiiasy qatysty. Missiia jibergenderdiń kóbi – Eýropa elderi. Resei syrtqy ister ministrliginiń ókili Mariia Zaharova muny eldiń ishki isine aralasý dep baǵalady.
- Aleksei Navalnyi 2020 jylǵy 20 tamyzda Tomskiden Máskeýge jol tartqan ushaqtyń bortynda esinen tańyp, ony aldymen Ombydaǵy aýrýhanaǵa jatqyzyp, keiinirek Germaniiadaǵy klinikaǵa alyp ketti. Ol jaqta mamandar saiasatkerdiń aǵzasynan áskeri ýdyń izderin tapty. Eýroodaq, AQSh jáne Ulybritaniia ýdyń himiialyq qarýǵa qatysy baryn aityp, Resei biliginen túsinikteme talap etti. Resei biligi dárigerlerge siltep, ýlaý faktisin joqqa shyǵarady.
- Navalnyi esin jiyp, Berlindegi "Sharite" klinikasynan shyqqan soń Germaniiada birneshe ai bolyp, saýyqtyrý emin qabyldaǵan. Resei jazany atqarý federaldyq qyzmeti (FSIN) saiasatkerdi qaida júrgeni týraly durys eskertpedi dep aiyptap, onyń 2014 jylǵy úkim boiynsha shartty jazasyn túrme jazasyna aýystyrýdy talap etti. Navalnyi bolsa, elde túrmege jabylýy múmkin ekenin bile tura, 17 qańtar kúni Máskeýge oraldy. Resei politsiiasy ony týra áýejaidan ustap áketti. 19 qańtar kúni Navalnyidyń Jemqorlyqpen kúres qory eki saǵatqa jýyqtaityn zertteý filmin jariialady. Onda Resei oligarhtarynyń Qara teńiz jaǵasyndaǵy záýlim úidiń qurylysyna 1,3 milliard dollar jumsaǵanyn, úidiń el prezidenti Pýtinge tiesili ekeni aitylady.
