Reseidiń túrmede jatqan oppozitsiialyq saiasatkeri Aleksei Navalnyidyń jaqtastary ony bosatýdy talap etip jańa miting uiymdastyratynyn habarlady. Bul týraly aqparat saiasatkerdiń saitynda jariialandy. Onyń jaqtastary narazylyq mitingisine qatysýǵa keminde 500 myń adam niet bildirse ǵana jiynnyń qaida, qashan ótetinin jariialamaq.
Mitingige barǵysy keletinderdi tirkeý úshin jańa sait ashylǵan, degenmen aktsiia týraly habar shyǵa salysymen Resei aýmaǵynda ol sait ashylmai qaldy. Navalnyi jaqtastary Resei tarihyndaǵy eń aýqymdy narazylyq ótkizemiz dep senedi. Olardyń aitýynsha, miting – Navalnyidy túrmeden shyǵartqyzýǵa baǵyttalǵan sharalardyń biri ǵana.
2 aqpanda Máskeýdiń Simonov aýdandyq soty "Jemqorlyqpen kúres qorynyń" jetekshisi Aleksei Navalnyidy 2013 jylǵy is boiynsha koloniiaǵa jiberý týraly sheshim shyǵarǵan. Saiasatker eki jarym jyldai túrmede otyrýy tiis. Ol Máskeýden 110 kilometr jerdegi Pokrov qalasynda ornalasqan IK-2 mekemesinde jazasyn ótep jatyr.
AQSh, Eýroodaq elderi jáne Resei oppozitsiiasynyń jaqtastary Navalnyidy bosatýdy talap etýmen keledi. Qysta Reseidiń túkpir-túkpirinde Navalnyi jaqtastarynyń jappai mitingileri ótti, oǵan ondaǵan myń adam qatysty. Sol jiyndarda politsiia myńdaǵan adamdy ustady.
Narazylyq sharalarynan soń sanitarlyq erejelerdi buzdy degen sebeppen saiasatker ainalasyndaǵylardyń ústinen is qozǵaldy. Tergeýshilerdiń aitýynsha, bul sharalar Reseide koronavirýs infektsiiasynyń jyldam taralýyna alyp kelýi múmkin. Navalnyi jaqtastarynyń bir bóligi úiqamaqta otyrsa, endi bir bóligi shetelge ketken.
