رەسەيدٸڭ تٷرمەدە جاتقان وپپوزيتسييالىق ساياساتكەرٸ الەكسەي ناۆالنىيدىڭ جاقتاستارى ونى بوساتۋدى تالاپ ەتٸپ جاڭا ميتينگ ۇيىمداستىراتىنىن حابارلادى. بۇل تۋرالى اقپارات ساياساتكەردٸڭ سايتىندا جارييالاندى. ونىڭ جاقتاستارى نارازىلىق ميتينگٸسٸنە قاتىسۋعا كەمٸندە 500 مىڭ ادام نيەت بٸلدٸرسە عانا جيىننىڭ قايدا, قاشان ٶتەتٸنٸن جارييالاماق.
ميتينگٸگە بارعىسى كەلەتٸندەردٸ تٸركەۋ ٷشٸن جاڭا سايت اشىلعان, دەگەنمەن اكتسييا تۋرالى حابار شىعا سالىسىمەن رەسەي اۋماعىندا ول سايت اشىلماي قالدى. ناۆالنىي جاقتاستارى رەسەي تاريحىنداعى ەڭ اۋقىمدى نارازىلىق ٶتكٸزەمٸز دەپ سەنەدٸ. ولاردىڭ ايتۋىنشا, ميتينگ – ناۆالنىيدى تٷرمەدەن شىعارتقىزۋعا باعىتتالعان شارالاردىڭ بٸرٸ عانا.
2 اقپاندا مەسكەۋدٸڭ سيمونوۆ اۋداندىق سوتى "جەمقورلىقپەن كٷرەس قورىنىڭ" جەتەكشٸسٸ الەكسەي ناۆالنىيدى 2013 جىلعى ٸس بويىنشا كولونيياعا جٸبەرۋ تۋرالى شەشٸم شىعارعان. ساياساتكەر ەكٸ جارىم جىلداي تٷرمەدە وتىرۋى تيٸس. ول مەسكەۋدەن 110 كيلومەتر جەردەگٸ پوكروۆ قالاسىندا ورنالاسقان يك-2 مەكەمەسٸندە جازاسىن ٶتەپ جاتىر.
اقش, ەۋرووداق ەلدەرٸ جەنە رەسەي وپپوزيتسيياسىنىڭ جاقتاستارى ناۆالنىيدى بوساتۋدى تالاپ ەتۋمەن كەلەدٸ. قىستا رەسەيدٸڭ تٷكپٸر-تٷكپٸرٸندە ناۆالنىي جاقتاستارىنىڭ جاپپاي ميتينگٸلەرٸ ٶتتٸ, وعان ونداعان مىڭ ادام قاتىستى. سول جيىنداردا پوليتسييا مىڭداعان ادامدى ۇستادى.
نارازىلىق شارالارىنان سوڭ سانيتارلىق ەرەجەلەردٸ بۇزدى دەگەن سەبەپپەن ساياساتكەر اينالاسىنداعىلاردىڭ ٷستٸنەن ٸس قوزعالدى. تەرگەۋشٸلەردٸڭ ايتۋىنشا, بۇل شارالار رەسەيدە كوروناۆيرۋس ينفەكتسيياسىنىڭ جىلدام تارالۋىنا الىپ كەلۋٸ مٷمكٸن. ناۆالنىي جاقتاستارىنىڭ بٸر بٶلٸگٸ ٷيقاماقتا وتىرسا, ەندٸ بٸر بٶلٸگٸ شەتەلگە كەتكەن.
