Túrmede otyrǵan reseilik oppozitsiialyq saiasatker Aleksei Navalnyi ózine taǵy úsh qylmystyq is qozǵalǵanyn habarlady. 25 mamyrda Instagramda jariialaǵan jazbasynda saiasatker jańa ister jaily bir kún buryn kelgen tergeýshiden bilgenin aitty.
Onyń sózine qaraǵanda, birinshi is boiynsha ol "Jemqorlyqpen kúres qoryna túsken aqshany urlady" dep aiyptalyp otyr. Ekinshi is boiynsha "jurtty azamattyq mindetterin oryndamaýǵa úndedi" degen kúdikke ilingen. Al úshinshi is boiynsha Kreml synshysy sýdiaǵa til tigizdi dep aiyptalyp otyr. "Sondyqtan meni munda kamerada qur shái iship, qol qýsyryp otyr dep oilamańyzdar" dedi saiasatker ázilmen.
"Meniń pármendi qylmystyq sindikatym ulǵaiyp barady. Barǵan saiyn jasaǵan qylmystarym kóbeiip jatyr. Tergeýshilerdiń isi – qanisherler, urylar men adam urlaýshylar emes, men boldym" dep jazdy.
Byltyr tamyzda "Novichok" tobyna jatatyn qaýipti zatpen ýlanǵan 44 jastaǵy saiasatker Germaniiada birneshe ai emdelip, biyl qańtar aiynda eline qaitqan. Máskeýge orala poltsitsiia ony áýejaidan ustap áketti. Aqpan aiynda Máskeý soty segiz jyl burynǵy "Iv Roshe" isi boiynsha Navalnyidy 3,5 jylǵa túrmede jiberdi. Qamaýda onyń densaýlyǵy kúrt nasharlady. Saiasatker qarsylyq retinde ashtyq jariialap, ózine táýelsiz dárigerdi kirgizýin talap etken. Keiinirek ashtyqty toqtatty.
Kreml qazir Navalnyi men jaqtastaryn qýdalaýdy kúsheitken. Resei dýmasy 25 mamyrda "ekstremistik uiym" músheleriniń sailaýǵa qatysýyna tyiym salatyn jobany ekinshi oqylymda maquldaǵan. Qyrkúiek aiyna belgilengen sailaý qarsańynda bilik Navalnyi qurǵan qor men taǵy eki uiymdy "ekstremistik uiym" retinde tanytýǵa kúsh salyp jatyr.
Áleýmettik zertteý qorytyndysy basqarýshy "Edinaia Rossiia" partiiasynyń bedeli buryn-sońdy bolmaǵan tómen deńgeige túsip ketkenin kórsetken.
