Aq qardyń kóbesi sógildi. Naýryzdyń naqyshyndai ár jerden qyltiǵan kók kórindi. Álbette, bul – qala syrtyndaǵy kórinis. Al qala kósheleri múlgip tur. Aldymyzda – qazaqtyń tól meiramy Naýryz. Alaida naýryz kójeniń iisi áli shyqqan joq.
Osyndaida esimizge Jańa jyl merekesi túsedi. Jasyl shyrsha, jasanǵan qala. Tipti, Jańa jylǵa jar aitqanda, qazaqtyń azaly hám ǵajaiyp kúni 16 jeltoqsannyń da mysy basylyp qalady. On altynshy jeltoqsan – kúntizbe betindegi qyzyl daq qana. Nege?
Keibirimiz bul jerde biliktiń esh kinási joq, másele halyqta degen áńgimege áńgúdiktei ilanamyz. Al eger bári halyqtyń qolynda bolsa, halyq jasampaz bolsa, ákimdik ne úshin kerek? Uiymdastyrýshy, úilestirýshi sol emes pe?! Jeltoqsannyń birinen bastap shyrsha jaǵyp, kósheni taqyrypqa sai sándeitin de – solar. Kósheńiz «men Jańa jyldy qarsy alýǵa daiynmyn» dep qyzsha qiylyp tursa, bizdiń kóńil qaitedi? Ishtei bolsa da oisyrap, ishtei bolsa da jeńilip, sol merekeniń jeteginde keterimiz haq. Bul – sanaǵa áser etýdiń tóte joly. Osy tásildi Naýryz meiramynda qoldansa, qoi degen kim bar? Ákimdikten osy týraly surap kórseńiz, «qarjy daǵdarysy» dep qaltasyn qaiyryp kórsetedi. Joq, bul – qarjy daǵdarysy emes, bul – ákimdiktegi ulttyq bolmystyń daǵdarysy. Odan basqa eshteńe emes…
Kólgirsýden aýlaqpyz, biraq kóshege qarap kóńil jetim. Qaida Naýryzdyń iisi? Oiý-órnek qaida, ulttyq naqysh qaida? Qysta Aiaz ata men Aqshaqar qyz turǵan jerge qazaqtyń aq saqaldy atasy men aq kimeshekti ájesiniń músinin somdasa, qandai kerim?! Jiyrma biri kúni ortalyq kósheni tas bekitip, jaǵalai kiiz úi tigýmen bitetin bul ne meiram?
Qazaqtyń Qazaqstandaǵy memleket quraýshy ult ekeni ras bolsa, ol ulttyń bedeli basqadan biik bolýy tiis. Qazaqty syilatý úshin merekesin keleke etpegen jón. Onsyz da «túie baqqan qazaq» degen atpen úsh ǵasyr qoidai jýsap jattyq. Endi óz dástúrimizdi dáriptep, ulttyq qundylyǵymyzdy ulyqtaiyq. Tarihtan taǵylym aityp, «Altyn Ordanyń» bel balasy ekenimizdi bildirip, «tepsinip kelgende, teń atanyń uly ekenimizdi» nege kórsetpeimiz?
15-18 naýryz aralyǵy amal nemese kórisý kúni ekeni belgili. Naýryz meiramy osy kúnnen bastalýy kerek. Al oǵan daiyndyq ai basynan jasalsyn. Jetim qyzdyń toiyndai etpesin ulyq meiramymyzdy. Kókeidegi sóz – osy.
Aitpaqshy, osy sailaý bizdiń ulttyq merekemizge ainalyp bara jatqan joq pa? Qazir bizdiń kósheden sailaýdyń iisi ańqidy. Taqyrypqa sai partiialar men úmitkerlerdiń sýretimen bezendirilip jatyr qalamyz. Áskeriler aitpaqshy, «urys urysymen, tamaq ýaqytymen» bolýy kerek qoi.
Janat JAŃQAShULY,
Aimaqtyq «Arqa aqshamy» qoǵamdyq-saiasi gazeti (№10(144) 10 naýryz 2016 jyl)
