Memleket basshysy Qasym-Jomart Toqaev qazaqstandyqtardy Naýryz meiramymen quttyqtady, dep habarlaidy Aqorda.
***
Ardaqty aǵaiyn!
Barshańyzdy Ulystyń Uly kúnimen shyn júrekten quttyqtaimyn!
Tirshilikti túletip, tabiǵatqa jan bitiretin Naýryz – bizdiń tól jańa jylymyzdyń bastaýy, jańǵyrý men jańa ómirge umtylýdyń nyshany. Ejelgi jyl qaiyrý dástúri – halqymyzdyń tereń tanymy men taǵylymdy tarihynyń kórinisi.
Shýaqty kóktem merekesin búkil el bolyp asyǵa kútemiz. Biz taǵdyrymyzben sabaqtas áz-Naýryzdan ótken ǵasyrda eriksiz ajyrap qaldyq. Egemendiktiń eleń-alańynda ejelgi saltymyzben qaita qaýyshtyq. Naýryzdyń kóne dástúrlerin nyǵaitý úshin Elbasy bul merekeni memlekettik meiramǵa ainaldyrdy.
Jyl basynda jariialanǵan «Táýelsizdik bárinen qymbat» atty maqalamda Naýryzdy jańasha atap ótý qajettigine toqtaldym. Merekeniń ár sáti elge paidasy tietin, urpaqqa ónege bolatyn igilikti iske ulasýǵa tiis.
Sondyqtan, qazir barlyq aimaqta jas urpaq úshin tárbielik máni zor kóptegen shara qolǵa alynýda. Munyń bárin Amal aiynan keiin de jalǵastyra beremiz.
Ulystyń Uly kúnin toilaý qalalar men aýyldardyń aýqymdy alańdary men kórikti kóshelerinde ótetin birneshe saǵattyq is-sharamen ǵana shektelmeýi qajet. Naýryz – eń aldymen, taǵylymy mol otbasylyq meiram. Merekelik kóńil-kúi barlyq shańyraqta bolýy kerek. Jastar úlkenderge sálem berip, batasyn alsa, bir-birine aq tilekterin arnasa, qandai jarasymdy?!
Naýryz – aǵaiyndy baýyrmaldyqqa, kórshi-qolańdy tatýlyqqa shaqyratyn bereke-birliktiń merekesi. Bul týraly Uly Abai «Qyrdaǵy el oidaǵy elmen aralasyp, kúlimdesip, kórisip, qushaqtasyp» dep jyrlaǵan.
Meiramnyń tereń filosofiialyq mazmuny jaqsylyqty eshqashan umytpai, qaiyrymdylyqtyń qadirin bilýge jáne tabiǵatpen úndestikte ómir súrýge úndeidi.
El uǵymynda qyrdyń qyzǵaldaǵy – naǵyz kóktemniń nyshany. Osy oraida, qyzǵaldaq gúlin Uly daladaǵy Ulystyń Uly kúniniń basty belgisi retinde bekitýge bolady.
Qurmetti qazaqstandyqtar!
Qazir dúniede geosaiasi dúrbeleń beleń alyp, halyqaralyq tartystar shielenise túsýde. Koronavirýs indeti órship, álem ekonomikasyndaǵy daǵdarys kúsheiýde. Osyndai kúrdeli kezeńde Qazaqstan halqy barlyq syn-qaterlerge tótep berý úshin birligin bekemdep, qaisarlyq tanytýy qajet.
Bizdiń babalarymyz ejelden Ulystyń Uly kúni bir-birine kómektesip, qiyn kezeńde qolyndaǵy baryn bólisken. Osy igi dástúrdi halqymyz áli kúnge deiin berik ustanyp kele jatqany kóńil qýantady.
Pandemiia kezinde ondaǵan myń dáriger men meiirbike, tártip saqshylary men áskeri qyzmetshiler jáne eriktiler eldiń densaýlyǵyn saqtaý úshin aianbai eńbek etýde. Mikrobiolog mamandarymyz az ýaqyttyń ishinde koronavirýsqa qarsy vaktsina jasap shyǵardy.
Azamattarymyzdyń naǵyz márttigi men shynaiy janashyrlyǵyn, zor jetistikterin áigileitin mysaldar óte kóp. Muny ózderińiz kórip-bilip júrsizder. Myzǵymas birliktiń, tatýlyq pen turaqtylyqtyń arqasynda eńsesi biik el bolyp otyrmyz.
Áz-Naýryz – izgilik pen qaiyrymdylyqtyń, meiirim men janashyrlyqtyń merekesi. Biz usynǵan ádiletti qoǵam jáne áleýmettik memleket qaǵidasy osy qundylyqtarmen tolyq úndesedi.
Sonymen birge, Naýryz – eldi eńbekke jumyldyryp, yrysymyzdy molaitatyn meiram. Biz babalar jolymen bilek sybana jumys istep, Qazaqstandy básekelik qabileti zor, qýatty memleketke ainaldyramyz.
Naýryzdyń taǵy bir belgisi – uqyptylyq pen tazalyq. Qazaq – tabiǵatqa etene jaqyn halyq. Ulystyń Uly kúni bulaqtyń kózin ashyp, aǵash egý, qorshaǵan ortany taza ustaý – erteden jalǵasyp kele jatqan dástúrimiz. Biz qolǵa alǵan «Taza tabiǵat» jobasynyń negizgi maqsaty – sol igi sharany jalǵastyrý.
Osylaisha, Ulys kúnin san túrli sipatta atap ótý ata saltymyz ben urpaqtar sabaqtastyǵyn saqtaý úshin kerek. Qazaqta «Saltyna qarap, halqyn tanisyń» degen qanatty sóz bar. Ulttyń jańa bolmysy jaqsy daǵdy men jaǵymdy qasiet arqyly qalyptasady.
Biyl biz tarihi meje – Táýelsizdiktiń 30 jyldyǵyn atap ótemiz. Osy ýaqyttyń ishinde elimiz tolaǵai tabysqa jetti. Biraq, jetistikke marqaiyp, bosańsýǵa bolmaidy. Biz memleketimizdi júieli ózgeristerge jeteleitin aýqymdy reformalardy jalǵastyra beremiz.
Jan-jaqty jańǵyrý ultymyzdy órge bastap, Qazaqstannyń Máńgilik el bolýyna jol ashady. Bizdiń basty maqsatymyz – osy!
Bosaǵamyzdan attaǵan Jańa jyl barshańyzǵa yrys-nesibe ákelsin dep tileimin!
Ár shańyraqqa qydyr qonyp, qut darysyn!
Ulystyń uly kúni qutty bolsyn!
