مەملەكەت باسشىسى قاسىم-جومارت توقاەۆ قازاقستاندىقتاردى ناۋرىز مەيرامىمەن قۇتتىقتادى, دەپ حابارلايدى اقوردا.
***
ارداقتى اعايىن!
بارشاڭىزدى ۇلىستىڭ ۇلى كٷنٸمەن شىن جٷرەكتەن قۇتتىقتايمىن!
تٸرشٸلٸكتٸ تٷلەتٸپ, تابيعاتقا جان بٸتٸرەتٸن ناۋرىز – بٸزدٸڭ تٶل جاڭا جىلىمىزدىڭ باستاۋى, جاڭعىرۋ مەن جاڭا ٶمٸرگە ۇمتىلۋدىڭ نىشانى. ەجەلگٸ جىل قايىرۋ دەستٷرٸ – حالقىمىزدىڭ تەرەڭ تانىمى مەن تاعىلىمدى تاريحىنىڭ كٶرٸنٸسٸ.
شۋاقتى كٶكتەم مەرەكەسٸن بٷكٸل ەل بولىپ اسىعا كٷتەمٸز. بٸز تاعدىرىمىزبەن ساباقتاس ەز-ناۋرىزدان ٶتكەن عاسىردا ەرٸكسٸز اجىراپ قالدىق. ەگەمەندٸكتٸڭ ەلەڭ-الاڭىندا ەجەلگٸ سالتىمىزبەن قايتا قاۋىشتىق. ناۋرىزدىڭ كٶنە دەستٷرلەرٸن نىعايتۋ ٷشٸن ەلباسى بۇل مەرەكەنٸ مەملەكەتتٸك مەيرامعا اينالدىردى.
جىل باسىندا جارييالانعان «تەۋەلسٸزدٸك بەرٸنەن قىمبات» اتتى ماقالامدا ناۋرىزدى جاڭاشا اتاپ ٶتۋ قاجەتتٸگٸنە توقتالدىم. مەرەكەنٸڭ ەر سەتٸ ەلگە پايداسى تيەتٸن, ۇرپاققا ٶنەگە بولاتىن يگٸلٸكتٸ ٸسكە ۇلاسۋعا تيٸس.
سوندىقتان, قازٸر بارلىق ايماقتا جاس ۇرپاق ٷشٸن تەربيەلٸك مەنٸ زور كٶپتەگەن شارا قولعا الىنۋدا. مۇنىڭ بەرٸن امال ايىنان كەيٸن دە جالعاستىرا بەرەمٸز.
ۇلىستىڭ ۇلى كٷنٸن تويلاۋ قالالار مەن اۋىلداردىڭ اۋقىمدى الاڭدارى مەن كٶرٸكتٸ كٶشەلەرٸندە ٶتەتٸن بٸرنەشە ساعاتتىق ٸس-شارامەن عانا شەكتەلمەۋٸ قاجەت. ناۋرىز – ەڭ الدىمەن, تاعىلىمى مول وتباسىلىق مەيرام. مەرەكەلٸك كٶڭٸل-كٷي بارلىق شاڭىراقتا بولۋى كەرەك. جاستار ٷلكەندەرگە سەلەم بەرٸپ, باتاسىن السا, بٸر-بٸرٸنە اق تٸلەكتەرٸن ارناسا, قانداي جاراسىمدى?!
ناۋرىز – اعايىندى باۋىرمالدىققا, كٶرشٸ-قولاڭدى تاتۋلىققا شاقىراتىن بەرەكە-بٸرلٸكتٸڭ مەرەكەسٸ. بۇل تۋرالى ۇلى اباي «قىرداعى ەل ويداعى ەلمەن ارالاسىپ, كٷلٸمدەسٸپ, كٶرٸسٸپ, قۇشاقتاسىپ» دەپ جىرلاعان.
مەيرامنىڭ تەرەڭ فيلوسوفييالىق مازمۇنى جاقسىلىقتى ەشقاشان ۇمىتپاي, قايىرىمدىلىقتىڭ قادٸرٸن بٸلۋگە جەنە تابيعاتپەن ٷندەستٸكتە ٶمٸر سٷرۋگە ٷندەيدٸ.
ەل ۇعىمىندا قىردىڭ قىزعالداعى – ناعىز كٶكتەمنٸڭ نىشانى. وسى ورايدا, قىزعالداق گٷلٸن ۇلى دالاداعى ۇلىستىڭ ۇلى كٷنٸنٸڭ باستى بەلگٸسٸ رەتٸندە بەكٸتۋگە بولادى.
قۇرمەتتٸ قازاقستاندىقتار!
قازٸر دٷنيەدە گەوساياسي دٷربەلەڭ بەلەڭ الىپ, حالىقارالىق تارتىستار شيەلەنٸسە تٷسۋدە. كوروناۆيرۋس ٸندەتٸ ٶرشٸپ, ەلەم ەكونوميكاسىنداعى داعدارىس كٷشەيۋدە. وسىنداي كٷردەلٸ كەزەڭدە قازاقستان حالقى بارلىق سىن-قاتەرلەرگە تٶتەپ بەرۋ ٷشٸن بٸرلٸگٸن بەكەمدەپ, قايسارلىق تانىتۋى قاجەت.
بٸزدٸڭ بابالارىمىز ەجەلدەن ۇلىستىڭ ۇلى كٷنٸ بٸر-بٸرٸنە كٶمەكتەسٸپ, قيىن كەزەڭدە قولىنداعى بارىن بٶلٸسكەن. وسى يگٸ دەستٷردٸ حالقىمىز ەلٸ كٷنگە دەيٸن بەرٸك ۇستانىپ كەلە جاتقانى كٶڭٸل قۋانتادى.
پاندەمييا كەزٸندە ونداعان مىڭ دەرٸگەر مەن مەيٸربيكە, تەرتٸپ ساقشىلارى مەن ەسكەري قىزمەتشٸلەر جەنە ەرٸكتٸلەر ەلدٸڭ دەنساۋلىعىن ساقتاۋ ٷشٸن ايانباي ەڭبەك ەتۋدە. ميكروبيولوگ ماماندارىمىز از ۋاقىتتىڭ ٸشٸندە كوروناۆيرۋسقا قارسى ۆاكتسينا جاساپ شىعاردى.
ازاماتتارىمىزدىڭ ناعىز مەرتتٸگٸ مەن شىنايى جاناشىرلىعىن, زور جەتٸستٸكتەرٸن ەيگٸلەيتٸن مىسالدار ٶتە كٶپ. مۇنى ٶزدەرٸڭٸز كٶرٸپ-بٸلٸپ جٷرسٸزدەر. مىزعىماس بٸرلٸكتٸڭ, تاتۋلىق پەن تۇراقتىلىقتىڭ ارقاسىندا ەڭسەسٸ بيٸك ەل بولىپ وتىرمىز.
ەز-ناۋرىز – ٸزگٸلٸك پەن قايىرىمدىلىقتىڭ, مەيٸرٸم مەن جاناشىرلىقتىڭ مەرەكەسٸ. بٸز ۇسىنعان ەدٸلەتتٸ قوعام جەنە ەلەۋمەتتٸك مەملەكەت قاعيداسى وسى قۇندىلىقتارمەن تولىق ٷندەسەدٸ.
سونىمەن بٸرگە, ناۋرىز – ەلدٸ ەڭبەككە جۇمىلدىرىپ, ىرىسىمىزدى مولايتاتىن مەيرام. بٸز بابالار جولىمەن بٸلەك سىبانا جۇمىس ٸستەپ, قازاقستاندى بەسەكەلٸك قابٸلەتٸ زور, قۋاتتى مەملەكەتكە اينالدىرامىز.
ناۋرىزدىڭ تاعى بٸر بەلگٸسٸ – ۇقىپتىلىق پەن تازالىق. قازاق – تابيعاتقا ەتەنە جاقىن حالىق. ۇلىستىڭ ۇلى كٷنٸ بۇلاقتىڭ كٶزٸن اشىپ, اعاش ەگۋ, قورشاعان ورتانى تازا ۇستاۋ – ەرتەدەن جالعاسىپ كەلە جاتقان دەستٷرٸمٸز. بٸز قولعا العان «تازا تابيعات» جوباسىنىڭ نەگٸزگٸ ماقساتى – سول يگٸ شارانى جالعاستىرۋ.
وسىلايشا, ۇلىس كٷنٸن سان تٷرلٸ سيپاتتا اتاپ ٶتۋ اتا سالتىمىز بەن ۇرپاقتار ساباقتاستىعىن ساقتاۋ ٷشٸن كەرەك. قازاقتا «سالتىنا قاراپ, حالقىن تانيسىڭ» دەگەن قاناتتى سٶز بار. ۇلتتىڭ جاڭا بولمىسى جاقسى داعدى مەن جاعىمدى قاسيەت ارقىلى قالىپتاسادى.
بيىل بٸز تاريحي مەجە – تەۋەلسٸزدٸكتٸڭ 30 جىلدىعىن اتاپ ٶتەمٸز. وسى ۋاقىتتىڭ ٸشٸندە ەلٸمٸز تولاعاي تابىسقا جەتتٸ. بٸراق, جەتٸستٸككە مارقايىپ, بوساڭسۋعا بولمايدى. بٸز مەملەكەتٸمٸزدٸ جٷيەلٸ ٶزگەرٸستەرگە جەتەلەيتٸن اۋقىمدى رەفورمالاردى جالعاستىرا بەرەمٸز.
جان-جاقتى جاڭعىرۋ ۇلتىمىزدى ٶرگە باستاپ, قازاقستاننىڭ مەڭگٸلٸك ەل بولۋىنا جول اشادى. بٸزدٸڭ باستى ماقساتىمىز – وسى!
بوساعامىزدان اتتاعان جاڭا جىل بارشاڭىزعا ىرىس-نەسٸبە ەكەلسٸن دەپ تٸلەيمٸن!
ەر شاڭىراققا قىدىر قونىپ, قۇت دارىسىن!
ۇلىستىڭ ۇلى كٷنٸ قۇتتى بولسىن!
