Foto:depositphotos.com
"Naýryz" ipotekasyna ótinishter maýsymnyń aiaǵyna deiin qabyldanady. Bul týraly "Otbasy bank" filialynyń direktory - basqarýshy direktor Jansultan Matai aitty, - dep habarlaidy "Ult aqparat" Tengrinews.kz saityna silteme jasap.
"Otbasy bank" filialy direktorynyń aitýynsha, olar jańa ipotekaǵa qatysýshylardy mazalap nemese asyqtyrmaý úshin osyndai sheshimge kelgen.
"Ótinish bildirýshilerdi asyqtyrmaý úshin maýsymnyń aiaǵyna deiin ótinishterdi qabyldaýǵa áli bir jarym ai ýaqyt bar. Búgin úlgermegenderde áli múmkindik bar. Iaǵni, birinshi kúni nemese sońǵy kúni ótinish bergenińiz mańyzdy emes. Sondyqtan asyǵýdyń qajeti joq, ótinish bergende barlyq qajetti qujattardy jinaǵany durys", – deidi Matai.
Búginde "Naýryz" baǵdarlamasy boiynsha 17 432 qazaqstandyq ótinish berip, onyń 8 945-i qabyldandy. Bul týraly "Otbasy bank" AQ basqarma tóraǵasy Liazzat Ibragimova aitty. Atalǵan baǵdarlama 25 sáýirde iske qosylǵan.
"10 mamyrdaǵy jaǵdai boiynsha 17 432 qazaqstandyq ótinish berdi. Onyń ishinde 8 945 ótinish qabyldandy. Olardyń jartysy, iaǵni 3 955 ótinish turǵyn úige kezekte turǵan halyqtyń áleýmettik osal tobynan túsken. Bul – kópbalaly otbasylar, jetim balalar, turǵyn úii apatty dep tanylǵandar", - dedi Liazzat Ibragimova OKQ-da ótken baspasóz máslihatynda.
Baǵdarlamaǵa túsken ótinishterdiń 57 paiyzyn áielder jibergen, al túsken barlyq ótinishtiń 62 paiyzy 35 jasqa deiingi jastar.
"Eń jas ótinish bergen azamat – Túrkistan oblysynyń turǵyny. Ol – 18 jasta", - dedi basqarma tóraǵasy.
