NATO Arktikadaǵy áskeri nysandardy kúsheitýge nietti. Mundai qajettilikti NATO Bas hatshysy Iens Stoltenberg Kanada premer-ministri Djastin Triýdomen eldiń áskeri nysandaryna birlesken saparynyń qorytyndysy boiynsha aitty, - dep habarlaidy Tengrinews.kz agenttigi Vesti.ru saityna silteme jasap.
"Resei zymyrandary men bombalaýshy ushaqtary úshin Soltústik Amerikaǵa eń qysqa jol Soltústik poliýs arqyly ótedi. Bul NATO úshin AQSh-Kanada birlesken aeroǵaryshtyq qorǵanys júiesiniń rolin mańyzdy etedi. Alianstyń jańa tujyrymdamasy Reseidiń Qiyr Soltústiktegi áleýetin strategiialyq synaq retinde anyqtaidy", - dedi Stoltenberg.
Ol Resei jańa arktikalyq qolbasshylyq quryp, Arktikada júzdegen áskeri nysandar ashqanyn eske saldy.
"Qytai da óz qatysyn keńeitip jatyr. Beijiń men Máskeý de Arktikadaǵy praktikalyq yntymaqtastyqty jandandyrýǵa mindetteme aldy. Bul bizdiń qundylyqtarymyz ben múddelerimizge qaýip tóndiredi. Qazirdiń ózinde Atlant muhitynda jańa NATO qolbasshylyǵyn qurdyq. Odaqtastar, sonyń ishinde Kanada da bar", - dedi alianstyń bas hatshysy.
Stoltenberg pen Triýdo qos maqsattaǵy jobalarǵa, sonyń ishinde aeroǵaryshtyq baqylaý júielerine jańa investitsiialar týraly habarlady.
Óz kezeginde AQSh prezidenti Djo Baiden Arktikadaǵy elshi laýazymyn qurý týraly sheshim qabyldaǵan. Memlekettik departament jańa laýazymnyń engizilgenin 26 tamyzda resmi túrde jariialaityny, sodan keiin bul sheshimdi Senat bekitýi kerek ekeni atap ótildi.
