COVID-19 statistikasy alańdaýshylyq týdyrýda. Bul týraly Almaty qalasy Qoǵamdyq densaýlyq saqtaý basqarmasynyń basshysy Nariman Tabynbaev onlain brifingte aitty, dep habarlaidy QazAqparat.
Onyń aitýynsha, qaladaǵy epidemiologiialyq jaǵdai alańdatýda. Aýyrǵandardyń kúndelikti sany 130 adamnan tómen túspei otyr.
«Birinshiden, biz bul kórsetkishterdi virýstyq infektsiialar sanynyń maýsymdyq artýymen bailanystyramyz. Ár túrli jaǵdailardyń, sonyń ishinde jaǵymsyz jaǵdailar sanynyń artyp jatqandyǵyna qaramastan, qalanyń densaýlyq saqtaý júiesi COVID-19-men kúresýge daiyn», - deidi ol.
Almatyda pandemiia bastalǵaly 21 547 KVI jaǵdaiy tirkelse, sońǵy táýlikte jańadan 139 jaǵdai anyqtaldy. Aýrýdan saýyqqandar sany – 19 487 adam, bul juqtyrǵan barlyq jaǵdailardyń 91%-yn quraidy.
Nariman Tabynbaev koronavirýspen kúresýge baǵyttalǵan ýaqtyly qabyldanǵan sheshimder aýrý sanynyń kúndelikti artyp kele jatqandyǵyna qaramastan óz nátijesin berip jatqanyn aitady.
«Infektsiialyq statsionarlardyń júktemesi turaqty deńgeide, búgingi kúni 724 tósek-oryn bos emes, bul rette onyń 61%-y bos jáne 5 145 tósek-oryn rezervte tur. Qazirgi ýaqytta, táýligine, orta eseppen 50-90 patsient emdeýge jatqyzylýda. Bizde jansaqtaý bólimsheleri 50%-ǵa tolyq. Bastapqyda reanimatsiialyq tósek-oryndar sany 80 bolsa, bizge tósek-oryndar sanyn 120-ǵa deiin ulǵaitýǵa týra keldi», - deidi dáriger.
Sonymen qatar, ol KVI juqtyrǵandardyń arasynda basqa da aýrýy bar naýqastar sany aitarlyqtai óskendigin jetkizdi. Bul rette ol qala turǵyndarynan úiden sirek shyǵýdy, adamdar kóp jinalatyn oryndarǵa barmaýdy, ózin-ózi emdeýmen ainalyspaýdy jáne bilikti meditsinalyq kómekke júginý qajettigin aitty.
«Meditsinalyq-sanitariialyq alǵashqy kómek uiymdarynda COVID-19-ben kúresý úshin, úide emdelip jatqan patsientterge monitoring júrgizetin Mobildi brigadalar quryldy. Qazirgi kezde úide meditsinalyq baqylaýda 797 adam bar, simptomsyz, aýyrlyq dárejesi jeńil belgilerimen 254 jáne 543 patsient em qabyldaýda», - deidi Tabynbaev.
Byltyr qyrkúiek aiynda COVID-19 virýsyn juqtyrǵan patsientterdi emdeý boiynsha MSAK uiymdaryn qoldaý maqsatynda, qaýipti toptardaǵy karantindik patsientterdi qashyqtyqtan baqylaý jáne konsýltatsiialar júrgizý úshin telemeditsina ortalyǵy qurylǵan bolatyn. Qarashadan bastap búgingi kúnge deiin ortalyq mamandarymen 12 000-nan astam kiris qońyraýy qabyldanyp, 51 000-nan astam shyǵys qońyraýy jasaldy.
