Foto: gorodovoy.ru
Almatyda áleýmettik nannyń baǵasy resmi túrde bekitildi. Qala ákimdigi "Almaty" áleýmettik-kásipkerlik korporatsiiasy men "Almatynan" nan-toqash kombinaty arasynda tiisti kelisim jasalǵanyn málimdedi, dep habarlaidy Ult.kz.
Kelisimge sáikes, birinshi surypty unnan daiyndalatyn 3,8 mln-nan astam bólke nan satylymǵa shyǵarylady. Bir bólkeniń bosatylý baǵasy 130 teńge bolyp belgilense, saýda ústemesi 15%-dan aspaýy tiis.
Ákimdik málimetinshe, keibir dúkender nandy ústemesiz de satýy múmkin. Baǵany turaqtandyrý sharalary 2027 jyldyń mamyryna deiin jalǵasady. Áleýmettik nan iri sýpermarketterde de, shaǵyn dúkenderde de qoljetimdi bolady.
Sonymen qatar qalada ózge de áleýmettik mańyzy bar azyq-túlik baǵasyn ustap turý boiynsha jumystar júrgizilip jatyr. Bul baǵytta jumyrtqa, qus eti jáne qant baǵasyna erekshe nazar aýdarylǵan.
Máselen, "Sary-Bulaq" qus fabrikasymen 86,4 mln dana jumyrtqany belgilengen baǵamen jetkizý týraly kelisim jasaldy. Bir jumyrtqanyń baǵasy 59 teńgeden aspaidy. Ónim Magnum, Small, Metro, A-store jelilerinde jáne "Alataý-qus" dúkenderinde satylady.
Sondai-aq "Alataý-qus" jáne Nauryz Agro KZ kompaniialarymen qus eti baǵasyn turaqtandyrý týraly kelisimder bar. "Alataý-qus" dúkenderinde san eti men jilik 1100 teńgeden, siraǵy 1650 teńgeden satylyp jatyr. Al Nauryz Agro KZ ónimderi 1300 teńge shamasynda turaqtandyrylǵan. Magnum Cash&Carry jelisinde baǵa 1495 teńgeden aspaidy. Bul kelisimder úsh jylǵa deiin kúshinde bolady.
Budan bólek, "Almaty" ÁKK 4,5 myń tonna qant satyp alǵan. Qant Magnum, Small, Toimart, "Stolichnyi", "Iýbileinyi" jáne ózge de dúkenderde 10%-dan aspaityn ústememen satylady. Bir kelisiniń bosatylý baǵasy 405 teńge deńgeiinde belgilengen. Qant baǵasyn turaqtandyrý sharalary biyl qarashaǵa deiin jalǵasady.
