Aýyl sharýashylyǵy ministrligi tamaq qaýipsizdigin baqylaý sharalaryn tolyǵymen ózine júkteýdi surap otyr, dep xabarlaidy QazAqparat tilshisi.
QR Aýyl sharýashylyǵy ministriniń birinshi orynbasary Arman Evnievtiń aitýynsha, búginde azyq-túlik qaýipsizdigi salasyndaǵy biryńǵai organnyń bolmaýynan texnikalyq reglamentter tolyqqandy oryndalmaidy. Sonyń saldarynan ishki naryqty qorǵaý qiyn.
"Máselen, syrttan keletin qus eti birneshe ret muzdatylady. Sebebi ishine sý jáne taǵy basqa qospalardy aralastyryp jatady. Negizgi maqsat - ettiń salmaǵyn arttyrý. Sol siiaqty sary maidy óndirý salasynda falsifikatsiia kóp. Negizi, texnikalyq standarttar boiynsha sary maidyń bir kelisin óndirý úshin, kem degende, 22 litr sút kerek. Sonda naǵyz maidyń óz baǵasy kelesi úshin 2 750 teńgeden kem bolmaýy qajet. Al ótken jyldyń 11 aiynda Qazaqstanǵa 1 858 tonna sheteldik sary mai importtaldy. Atalǵan ónimniń baǵasy eki esege arzan bolyp shyqty. Bul degenimiz, ondai maidy óndirý kezinde arzan qospalar qoldanylady", - dedi A.Evniev Úkimettiń búgingi otyrysynda.
Vitse-ministrdiń sózine qaraǵanda, sary mai siiaqty sheteldiń arzan ónimderi otandyq taýarlardy shyǵarýǵa kedergi bolyp otyr. Sebebi baǵasy - arzan, biraq sapasy - tómen. Arzan ónim importtalǵannan keiin memleket tarapynan otandyq ónimderge jasalatyn barlyq qoldaý sharalary tiimsiz bolyp qalady.
"Sol sebepti Aýyl sharýashylyǵy ministrligin barlyq tamaq ónimderiniń qaýipsizdigin baqylaý salasyndaǵy biryńǵai organ retinde belgileý kerek. Ondai tájiribe Kanada, Frantsiia, Litva, AQSh, Qytai siiaqty elderde bar", - dep atap kórsetti A.Evniev.
