Memleket jáne qoǵam qairatkeri Myrzatai Joldasbekovtyń aitýynsha, Úkimet pen Parlamenttiń jaýapkershiligin kúsheitetin ýaqyt jetti. Árkim óz mindetin oryndaý kerek. Ásirese, ministrlerge Prezidentke jaltaqtap, «Sizdiń tapsyrmańyzben...» degen siiaqty sózderdi qoiý kerek. Bul týraly professor bilik tarmaqtary arasynda ókilettikterdi qaita bólý máselesi áńgime arqaýy bolǵan Qazaqstan halqy Assambleiasy keńesiniń otyrysynda aitty, dep habarlaidy Ult.kz tilshisi Baq.kz portalyna silteme jasap.
«Jalpy, osyny kóp shýlatýdyń keregi joq dep oilaimyn. Óitkeni, Elbasy neni bolsa da, pisirip-jetildirip kelip, halyqqa jariialaidy. Shynynda da, alǵashqy kezde árkim óz betimen jan-jaqqa shapqylap ketetin kezde, qaýip boldy. Sondyqtan bilik tutas bir qolda bolýy kerek edi, shashyratpaý kerek bolatyn. Endi jailap 25 jyldan keiin bilikti ókiletti organdarǵa bólip-bólip berý kerek. Biraq bólgende de, báribir biz prezidenttik basqarýdyń memleketi bolyp qalamyz», - dedi M.Joldasbekov.
Professordyń aitýynsha, bilikte otyrǵandar jaltaqtap Prezidentke qarap otyrmai, óz mindetin bilýi kerek.
«Endi, máselen, jurttyń bári jaltaqtap Prezidenttiń aýzyna qarap, «osy kisi ne aitady» dep otyrmaý kerek. Ministrlerdiń ózi bala siiaqty bolyp, «sizdiń tapsyrmańyzben», «sizdiń tapsyrmańyzdy oryndaý úshin» degen siiaqty sózderdi qoiý kerek. Árkim óz mindetin oryndaý qajet», - deidi ol.
Sondai-aq, qoǵam qairatkeriniń paiymdaýynsha, Prezident úkimetke óziniń ókilettikteriniń bir bóligin bere otyryp, olardy synaiyn dep otyr.
«Prezident áleýmettik-ekonomikalyq biraz máselelerdi Úimetke bereiin dep otyr. Memleket basshysy olardy ári qarai qalai alyp júretinin kórip, synaiyn dep otyr. Endi úkimetimiz de jaltaqtamai ózi júrgizýi kerek», - deidi el aǵasy.
«Osy kúni el ishinde parlamentke qatysty «qalta parlament» degen siiaqty áńime kóp. Bizdiń parlament eshbir memlekettiń parlamentinen kem emes. Osy jyldar ishinde qanshama zań qabyldady, olardyń eshqaisysy qate bolǵan joq. Parlamenttiń de róli kúsheimek. Úkimet onyń aldynda esep beretin bolady», - dedi M.Joldasbekov.
Eske sala ketsek, Memleket basshysy 25 qańtar bilik tarmaqtary arasynda ókilettikterdi qaita bólý boiynsha Qazaqstan halqyna úndeý jasaǵan edi. Saiasi reformaǵa sáikes, Prezidenttiń áleýmettik-ekonomikalyq protsesterdi retteýdegi birshama ókilettikteri Úkimetke jáne basqa da atqarýshy organdarǵa berilmek. Sonda bul salaǵa Úkimet, ministrlikter jáne ákimdikter tolyqtai jaýap beretin bolady. Bul ózgeristerdi Úkimet qazirgi Parlamenttiń sessiianyń aiaǵyna deiin Parlamentke engizýi tiis.
Budan bólek, bilik tarmaqtary arasyndaǵy qarym-qatynasty konstitýtsiialyq deńgeide teńgerimdi etý maqsatynda Úkimetti jasaqtaýdaǵy Parlamenttiń róli kúsheitiledi. Parlament sailaýynda jeńgen partiia Úkimet quramyn anyqtaýǵa túbegeili yqpal etetin bolady. Bul ministrler kabinetiniń ókiletti bilik aldyndaǵy jaýapkershiligin arttyrmaq. Tiisinshe, biliktiń zań shyǵarýshy tarmaǵynyń atqarýshy bilikke baqylaýyn kúsheitedi.
