Mysyrda joǵalǵan qazaqstandyq stýdentterdiń júris-turysynan jat din belgileri baiqalǵan emes. Bul týraly BAQ ókilderine QR Syrtqy ister ministrligi baspasóz qyzmetiniń jetekshisi Ánýar Jainaqov málim etti, dep habarlaidy "Ult aqparat".
«Bizdegi málimetterge sáikes, alty qazaqstandyq stýdent 20 shildeden bastap jaqyndarymen bailanysqa shyqpaǵan. Olardyń ekeýi 11 shilde kúni eki ailyq tildik kýrstan ótý úshin Kairge kelgen. Barlyǵy bir páterde turǵan. 20 shildeden bastap olarmen bailanys úzilgen. Sol sátten bastap qazaqstandyq diplomattar izdeý sharalaryna kirisip ketti. Qazaqstannyń Elshiligi Mysyrdyń Syrtqy ister ministrligine qazaqstandyq azamattardy izdeýge jáne qai jerde ekendikterin anyqtaýǵa járdem berýlerin ótinip nota joldady. Qazirgi ýaqytta qazaqstandyqtardy izdeý jumystary jalǵasýda. Meniń bilýimshe, olar «Nil» dep atalatyn oqý ornynda bilim alyp jatqan. Elshiligimizdiń dereginshe, olardyń júris-turysynan dástúrli emes dini senim belgileri baiqalmaǵan», - dedi Jainaqov.
Eske sala ketsek, Mysyrda joǵalyp ketken Qanat Berikke Aibol Isabek esimdi áleýmettik jeli qoldanýshy Facebook arqyly izdeý jariialaǵan bolatyn. Onyń jazýynsha, Qanat 11 shilde kúni dosy Elaman Jazylhanmen Mysyrǵa ushyp ketken.
«Almatydan Shardj qalasyna ushqan. Shardjdan Aleksandriiaǵa. Barǵan sátte QR elshiligine tirkelgen. 20 shilde kúni ekeýi de bailanysqa shyqpai qaldy. Egipettegi Qazaqstan Konsýly Ershat olardyń qaida ekenin bilmeidi. Olardy izdestirýge barshańyzdan kómek suraimyn! Sońǵy derek boiynsha, taǵy 4 bala joǵalǵan. Jalpy sany 6 qazaqstandyq stýdent joǵalyp ketti», - dep jazdy ol.
