Mysyrda Sultan Beibarys medresesi qaqpasynyń esh jerde jariialanbaǵan sýreti tabyldy, dep habarlaidy QazAqparat.
Súiinshili habardy Qazaqstannyń Mysyrdaǵy Tótenshe jáne ókiletti elshisi Qairat Lama Sharif Facebook-paraqshasynda jazdy.
«Súiinshi, aǵaiyn! Sultan Beibarys medresesiniń áshekeili qaqpasynyń sýreti tabyldy. Mysyrlyq mámlúktanýshylar buryn-sońdy áleýmettik jelilerde jariialanbaǵan az-Zahariia medresesi qaqpasynyń sýretin taýyp berdi. Osy úshin Imad Osman Mahran bastaǵan mámlúktanýshylarǵa jáne Mysyrdyń Kóne eskertkishter men týrizm ministrliginiń qyzmetkerlerine sheksiz alǵysymdy aitamyn», - dep jazdy diplomat. Elshiniń aitýynsha, 1262 jyly Ain Jalut shaiqasynan jeńispen oralǵan Sultan Beibarys Kairde teńdesi joq jańa úlgidegi medrese salyp, onyń bas qaqpasyn Kairdiń qolóner sheberlerine jasatqan.
«Qaqpanyń mańdaishasynda «Mońǵol-tatar basqynshylary men kresshilerge Mysyr jerin bastyrmaǵan ál-Málik az-Zahir Rúkn ad-Din Beibarys» dep jazylǵan. Kóne Kair shaharynyń tórinde osyndai áshekeili Jeńis qaqpasyn ornatqan Sultan Beibarystyń sáýlet ónerindegi talǵamy zor bolǵanyn aiǵaqtaidy», - dep jazdy Qairat Lama Sharif.
