Ońtústik Qazaqstan oblysy Maqtaral aýdanynda jergilikti ákimdik pen oblystyq Aýyl sharýashylyǵy basqarmasynyń uiymdastyrýymen «Maqtaral aýdanynyń jaǵdaiynda maqta baptaýdyń innovatsiialyq ádisterin qoldaný» taqyrybynda seminar - trening ótti. Bul týraly OQO ákiminiń baspasóz qyzmeti habarlady.
Jiynǵa aýdan ákimi Ǵalym Ismailov, oblystyq Aýyl sharýashylyǵy basqarmasynyń basshysy Serik Turbekov, Shardara, Ordabasy aýdandary men Túrkistan qalasy ákimderiniń salalyq orynbasarlary jáne aýyl sharýashylyǵy bólimderiniń basshylary, sondai-aq Almaty men Jambyl oblystarynan kelgen ǵalymdar, jergilikti sharýalar qatysyp, tyń tájiribeler men jańalyqtardyń kýási boldy.
Eń aldymen seminar treningke qatysýshylar Dostyq aýyldyq okrýgindegi K-19-7 kanalynyń boiynda «Qazaq sý sharýashylyǵy» ǵylymi zertteý institýty oilap tapqan sý ólsheýish quraldy praktikalyq synaqtan ótkizdi. Institýt mamandary qurastyrǵan sý deńgeiiniń datchigi ýltradybysty ólshegish arqyly sý deńgeiiniń ózgerisi týraly aqparattardy qashyqtan alýǵa múmkindik beredi. Aqparat jeke pochtańyzǵa nemese SMS túrinde mobildi telefonyńyzǵa kelip túsedi. Kompiýter men smartfon damyǵan búgingi tańda maqtaraldyq diqandarǵa bul qurylǵymen jumys jasaý qiyndyq týdyrmaidy. Jalpy, DÝV 0,005-10 datchigin sýarmaly júielerdiń gidrobeketterine engizý – sý deńgeii men shyǵynyn anyqtaý dáldigin joǵarylatady jáne aqparatty jyldam alýǵa kómektesedi.
Maqtaral aýdanynyń sýarmaly jerlerine jer asty jáne qashyrtqy káriz sýlaryn fosfogips engizý arqyly paidalaný tehnologiiasyn ǵalymdar birneshe aidan beri «Ketebai» kooperativinde synaqtan ótkizip kelgen. Synaqtan ótip jatqan tehnologiianyń basty maqsaty - sýarmaly jerlerdiń qunarlyǵyn saqtai otyryp mol ónimge qol jetkizý. «Fosfogipsti bir ret engizgen jaǵdaida keminde 3-4 jyl boiy jer qunarlyǵyn joǵaltpaidy», - deidi «Qazaq sý sharýashylyǵy» ǵylymi zertteý institýtynyń ǵalymdary.
Seminar treninge qatysýshylardyń kelesi aialdaǵan jeri – J.Eraliev aýyldyq okrýgindegi «Nuraly jol» sharýa qojalyǵy. Erbol Eralievtiń basshylyǵyndaǵy qojalyq 7 jyl buryn aýdanda eń birinshi bolyp «tereń qopsytý» tehnologiiasyn qoldanǵan bolatyn. Nátijesinde qojalyq maqtasynyń ónimdiligi 40 tsentnerge deiin artty. Bul tehnologiianyń bir paidasy – maqta alqaby qysqy sýarý kezeńinde kóbirek sý qajet etkenimen, jazǵy sýarý kezinde sýdy kóp qajet etpeidi jáne ol maqtaraldyqtar úshin óte tiimdi. Osylaisha Maqtaralda maqta óndirýden aldyna jan salmaityn sharýashylyqtyń tájiribesin seminar-treningke qatysýshylar kórip, úirenip qaitty.
