Kúzdegidei janarmai tapshylyǵy bolmaý úshin munai óńdeý zaýyttaryn jóndeý kestesi qatań saqtalýy kerek. Energetika ministri Maǵzum Myrzaǵaliev Ortalyq kommýnikatsiialar qyzmetinde ótken brifingide osyndai pikir bildirdi, dep habarlaidy QazAqparat.
«Bizge byltyrǵy qyrkúiek-qazan ailaryndaǵydai tapshylyq boldyrmaýǵa múmkindik beretin birneshe sharany usynyp otyr. Solai bolaryna sengim keledi. Birinshisi – zaýyttardy jóndeý máselesin túbegeili sheshetin norma. Biz munai óńdeýshi zaýyttardy jóndeý boiynsha 5 jyldyq jospardyń kestesin ázirledik. Iaǵni, jylyna bir zaýyt qana jóndeýden ótýi kerek. Tiisinshe, úsh zaýyt birinen keiin biri jóndelip otyrady», - dep túsindirdi vedomstvo basshysy.
Ministrdiń aitýynsha, janarmai tapshylyǵy sezile qalsa, naryqtyń suranysyna jaýap beretin jaǵdaida qosymsha qor saqtap otyrý kerek.
«Qańtar aiynan bastap biz kestege qol qoidyq. Osylaisha dizeldiń 200 myń tonnaǵa jýyq qoryn qalyptastyrýdy josparlap otyrmyz. Onyń 150 myń tonnasyn «QazMunaiGaz», 50 myń tonnany «QTJ» óz moinyna alady. Úshinshi mańyzdy norma – zańnamadaǵy novella. Ol munai bazalaryn «datchiktermen» jabdyqtaýǵa bailanysty. Osy kúzde biz eldegi naqty kórinisti bilmegendikten qiyndyqqa tap boldyq. Qazir zańnamalyq novellalar ázirlenip jatyr. 2023 jyldyń shildesinen bastap iri munai bazalaryn «datchiktermen» jabdyqtalady dep josparlap otyrmyz. 2024 jyldyń 1 shildesinen bastap usaq munai bazalary da esepteý júiesimen jabdyqtalady», - dep túsindirdi Maǵzum Myrzaǵaliev.
