Memleket basshysy Ekologiia, geologiia jáne tabiǵi resýrstar ministri Maǵzum Myrzaǵalievti qabyldady, dep habarlaidy Aqorda.
Qasym-Jomart Toqaevqa elimizdegi sý qoimalarynyń jaǵdaiy týraly esep berildi.
Maǵzum Myrzaǵalievtiń aitýynsha, sońǵy jyldary sý tapshylyǵyn boldyrmaýǵa baǵyttalǵan aýqymdy jumystar júrgizilip jatyr.
Atap aitqanda kórshi elderdiń quzyretti organdarymen ózara yqpaldasa otyryp, sý nysandaryn qaita qalpyna keltirý, tsifrlandyrý jáne sharýalardy sýmen qamtamasyz etý máseleleri qolǵa alyndy.
Qyrǵyz tarapymen Toqtaǵul sý qoimasynan qosymsha sý jiberýge kelisim jasalyp, Jambyl oblysyndaǵy Shý jáne Talas ózenderiniń basseinderine sý jiberý kestesi bekitildi.
Resei tarapymen Iriklinsk sý qoimasynan Jaiyq ózenine jiberiletin sýdyń kólemin kóbeitý jóninde kelissóz júrgizilip jatyr.
Prezidentke kiikterdi qorǵaý úshin qabyldanǵan sharalar men olardyń sanyn anyqtaý maqsatynda júrgizilgen sanaqtyń qorytyndylary jóninde aqparat berildi.
Salalyq vedomstvonyń málimeti boiynsha brakonerlikke qarsy tiimdi júrgizilgen kúrestiń jáne zańnamanyń qatańdatylýynyń arqasynda sońǵy 2 jyl ishinde kiikterdiń sany 334 myńnan 842 myńǵa deiin kóbeigen.
Memleket basshysynyń tapsyrmasy boiynsha Maǵzum Myrzaǵaliev Batys Qazaqstan oblysyna baryp, sarapshylarmen, ǵalymdarmen, jergilikti fermerlermen jáne ákimdikpen birlese otyryp, kiiktiń jaiylym órisin anyqtaý máselelerin keshendi túrde qarastyrǵan.
Qasym-Jomart Toqaev jalpy 657 myń gektar aýmaqty quraityn «Bókeiorda» jáne «Ashyózek tabiǵat qoryǵy» tabiǵi rezervattaryn qurý týraly sheshim qabyldady.
Bul sheshim Oral óńirindegi kiikterdiń Jaiyq ózeniniń sol jaǵalaýyna óris aýystyrýyna múmkindik beredi.
Budan bólek ministr balyqtardy qorǵaýǵa baǵyttalǵan «Bekire», «Ýyldyryq shashý» jáne «Taza toǵan» sharalary týraly aitty.
Osy sharalardyń nátijesinde birqatar qylmystyq is qozǵalyp, aiyppuldar salyndy, 300 shaqyrymǵa jýyq aý men birneshe kólik tárkilendi.
Prezidenttiń 2 milliard aǵash egý týraly tapsyrmasyn oryndaý aiasynda búginge deiin 80 million kóshet otyrǵyzylǵan.
Ekotýrizmdi damytý maqsatymen 4 iri ulttyq parkke jalpy quny 31 milliard teńgeden astam qarjy quiatyn investorlar anyqtaldy.
Prezident ministrliktiń bul baǵyttaǵy jumystaryn oń baǵalady.
Kezdesý sońynda Memleket basshysy sý resýrstaryn retteý máselesin erekshe baqylaýda ustap, brakonerlikpen kúresti kúsheitýdi tapsyrdy.
