QR Ekologiia, geologiia jáne tabiǵi resýrstar ministri Maǵzum Myrzaǵaliev Almatyda otalǵan aǵashtarǵa qatysty pikir bildirdi, dep habarlaidy "Ult aqparat".
«Keshe biz Almatyda aǵashtardy jabaiylyqpen kesý faktisine kýá boldyq. Oqiǵanyń qoǵam ashýyn týdyrýy oryndy. Mundai jaǵdailarǵa jol berýge bolmaidy!
Qazir elimiz boiynsha atmosferalyq aýanyń ahýalyn jaqsartý boiynsha úlken jumys júrgizilip jatyr, Ekokodeks qabyldanyp jatyr, Prezident 2 mlrd-tan astam aǵash egýge tapsyrma berdi. Qaýym bolyp jumylyp, bir maqsat jolynda jumys istep jatqanda, zańsyz aǵash kesý jaǵdaiy tipten orynsyz», - dedi Maǵzum Myrzaǵaliev .
Ministr biyl Memleket basshysynyń tapsyrmasymen aǵash kesýge qatysty jaýapkershilikti arttyrý boiynsha Zańǵa ózgerister engizilgenin atap ótti.
«Onyń ishinde, 1 aǵash kesilse, ornyna 10 aǵash egý ótemaqysy engizildi, aiyppul kólemi eki ese artty. Tabiǵi resýrstarymyzǵa uqypty qaraýǵa shaqyramyn. Bir aǵash jaiqalyp ósýi úshin ondaǵan jyldar kerek. Keleshegimiz bizdiń ekologiialyq mádenietimizdiń deńgeiine tikelei bailanysty», - dedi Maǵzum Myrzaǵaliev.
Budan buryn Prezident Qasym-Jomart Toqaev ta Almaty qalasy Tóle bi kóshesindegi aǵashtardyń otalǵanyna qatysty jaǵdaiǵa nazar aýdarǵan edi.
Eske sala ketsek, 23 qarashada túnde Almatyda saýda úiiniń janyndaǵy jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
«Qazir aýdan ákimdigi men Politsiia Departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia Departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etti qala ákimdigi.
Keiin Almaty qalalyq Jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady. Sulpak merdigerleri - «Sakýra» JK direktory A.Chertihinaǵa 55 560 teńge aiyppul salynyp, «Bóribekova» JK-ne 83 340 teńgege ákimshilik hattama toltyryldy.
Sondai-aq, Almaty prokýratýrasy «Sulpak» dúkenine irgeles aýmaqty abattandyrý kezinde jeke kásipkerdiń aǵashty zańsyz kesýin tekserýge kiristi.
