Qazaqstannyń Ekologiia, geologiia jáne tabiǵi resýrstar ministri Maǵzum Myrzaǵaliev Atyraýdaǵy munai gaz salasyn damytý jónindegi keńeske qatysty, dep habarlaidy "Ult aqparat" ministrliktiń baspasóz qyzmetine silteme jasap.
Shara barysynda ministr respýblikadaǵy munai-gaz sharýashylyǵyndaǵy negizgi ekologiialyq problemalardy, sondai-aq olardy tómendetý jospary týraly baiandady. Keńeske Qazaqstan Prezidenti Qasym-Jomart Toqaev ta qatysty.
Máselen, ministr M. Myrzaǵalievtiń aitýynsha, negizgi ekologiialyq problemanyń biri – Mańǵystaý oblysyndaǵy edáýir jinaqtalyp qalǵan munai qaldyǵy.
«Bul problema ondaǵan jyl boiy sheshilmei keledi. Osydan úsh apta buryn ministrlik pen QazMunaigaz arasynda memorandýmǵa qol qoiylyp, oǵan sáikes, QazMunaiGaz qaldyqtardy 2030 jylǵa deiin qaita óńdeýge mindetteldi», - dedi Ekologiia ministri.
Kókjide ken ornyndaǵy jerasty sýlaryn lastaýǵa jol bermeý – ministrlik moinyndaǵy taǵy bir problema.
«Kókjide kenorny – biregei joba. Ol batys óńirdegi halyqtyń qajettiligin ótei alady. 1983 jyldyń ózinde-aq mundaǵy táýliktik sý qorynyń mólsheri 196 myń m3 ekeni tujyrymdalǵan. Qazirgi ýaqytta ken orny aýmaǵynda 8 kómirsýtek shikizatyn óndirýshi qarqyndy jumys isteýde. Aýyz sýdyń tamasha kózin lastap alý qateri bar», - dedi ministr.
Osyǵan orai, Úkimet Kókjijeni zertteýge qarjy bólip otyr.
M.Myrzaǵalievtiń aitýynsha, úsh jyl ishinde jerasty sý qoryn baǵalaý júrgizilip, ken ornynyń sulbasy naqtylanady, ekologiialyq aýyrtpalyq ta esepteledi.
«Ministrlik sondai-aq munai operatsiialaryn baqylaý men monitoringileýdi kúsheitedi», dedi ol.
Taǵy bir ekologiialyq mindet – ainalymdy sýmen qamtamasyz etý.
«Munai kompaniialarynyń ortasha ainalymdy sýmen qamtamasyz etý deńgeii 30-40%. Biz 2025 jylǵa qarai bul kórsetkishti 70%-ke jetkizý maqsatyn qoiyp otyrmyz.
Sizdiń tapsyrmańyz boiynsha osy jáne ózge de ekologiialyq máselelerdi sheshý úshin jańa ekologiialyq kodeks ázirlenip jatyr. Qazirgi ýaqytta ol jurtshylyq arasynda talqylanýda. Jyl sońynda ony Parlamentke engizemiz», - dedi ministr.
