Mianmanyń qaýipsizdik kúshteri 27 naýryzda áskeri bilikke qarsy shyqqan 100-den astam adamdy óltirdi. Bul – azamattyq bilikti qulatyp, bilik basyna áskeriler kelgeli bergi eń qandy kún. Elde 1 aqpanda Ońtústik-Shyǵys Aziiadaǵy bul elde tóńkeris bolyp, bilik basyna áskeriler kelgeli narazylyq basylmai tur.
Osy kúni Mianma qarýly kúshteri kúnin atap ótken hýnta eldiń áskeri ál-aýqatyn kórsetetin parad ótkizdi.
Myanmar Now onlain aqparat saitynyń 27 naýryzda keshkisin jariialaǵan aqparaty boiynsha, bir táýlikte bolǵan oqiǵalardan keminde 114 adam qaza tapqan. Rangýndaǵy táýelsiz zertteý uiymy 20 shaqty qaladan jinalǵan málimet negizinde 107 adam opat bolǵanyn habarlasa, eldegi saiasi tutqyndar qaýymdastyǵy 91 adamnyń mert bolǵanyn aitty.
ÁLEMNIŃ REAKTsIIaSY
AQSh, Eýroodaq pen Britaniia jáne Birikken Ulttar Uiymy 27 naýryzdaǵy qantógisty qatań aiyptady.
AQSh memlekettik hatshysy Entoni Blinken "Mianmanyń qaýipsizdik kúshteri jasaǵan qantógisten úreilengenin" aitty jáne áskerdiń "birneshe adamǵa qyzmet etý úshin adam ómirin qiiýǵa ázir ekenin" dáleldedi dedi.
"Mianmanyń batyr halqy áskerdiń terrormen el bileýine qarsylyq bildirdi" dedi Blinken.
Eýropa odaǵyń Mianmadaǵy delegatsiiasy elde atap ótilgen "qarýly kúshter kúnin" "terror men uiat kúni" dep atady. Al Britaniianyń syrtqy ister ministri Dominik Raab muny Mianmadaǵy áskeri hýntanyń "quldilaǵan" kúni dep sipattady.
Birikken Ulttar Uiymy "jantúrshiktirer qantógis" kezinde "ondaǵan adamnyń óltirilgeni" týraly málimet alǵanyn habarlady. Uiymnyń deregi boiynsha, bul kúni eldiń keminde 40 qalasynda júzdege adam jaraqat alǵan, saqshylar adamdardy jappai tutqyndaǵan.
BUU bas hatshysy Antoniý Gýterrish "qaýipsizdik kúshteriniń ondaǵan beibit adamdy, sonyń ishine balalar men jastardy óltirgenin óte qatań aiyptaimyn" dedi.
"Tolassyz áskeri janyshtaýǵa tózýge bolmaidy, jáne bul birlesken, qatań ári batyl halyqaralyq reaktsiiany qajet etedi" dedi BUU bas hatshysy.
ÁSKERI PARADQA RESEI DELEGATsIIaSY QATYSTY
1 aqpandaǵy tóńkeristen beri bolyp jatqan narazylyqty hýnta aiaýsyz basyp tastap keledi. Sońǵy oqiǵalardan soń elde úkimetke qarsy sherýlerde qaza tapqandar sany 400-den asty. 2600-ge jýyq adam tutqyndalǵan.
Bilikti ustap otyrǵan general Min Aýn Hlain qarýly kúshter kúni sóilegen sózinde áskeri tóńkeristiń durystyǵyn aitty jáne jańa sailaýdan soń jeńgen adamǵa bilikti tapsyrýǵa ýáde etti.
Degenmen hýnta basshysy tóńkeriske qarsy sherýdi «eldiń tynyshtyǵy men qaýipsizdigine nuqsan keltiretin terrorizm» dep atady jáne mundaiǵa jol bermeitinin eskertti.
Qarýly kúshter kúni Mianma Ekinshi dúniejúzilik soǵysta Japoniia okkýpatsiiasynda bolǵan kezdi eske alady.
Merekege orai ótken áskeri paradqa segiz halyqaralyq delegatsiia, sonyń ishinde Qytai men Reseidiń ókilderi qatysqany habarlandy. Mianmanyń memlekettik telearnalary kórsetken habarǵa qaraǵanda, kórermender arasynda Resei qorǵanys ministriniń orynbasary Aleksandr Fomin bolǵan.
MIaNMADAǴY ÁSKERI TÓŃKERIS
1 aqpan kúni Mianma áskeri bilikti basyp alyp, eldiń de-fakto lideri Aýn San Sý Chji men birneshe saiasatkerdi qamaýǵa alǵan. Tóńkeristen keiin bilik ásker basshysy general Min Aýn Hlainǵa ótti.
Áskeriler byltyr qarashada ótken parlament sailaýy ádiletsiz ótti deidi. Ol sailaýda Aýn San Sý Chjidiń Demokratiiashylardyń ulttyq ligasy partiiasy jeńimpaz atanǵan.
Osydan keiin el turǵyndary jappai narazylyqqa shyǵyp, ásker biligine qarsylyq bildirdi. Olar Aýn San Sý Chjidi bosatyp, demokratiialyq tártipti qalpyna keltirýdi talap etedi.
Aqpannyń sońynda áskeriler narazylarǵa sýyq qarý qoldana bastady. 27-28 aqpan kúnderi ótken narazylyq aktsiialarynda politsiiamen qaqtyǵysta 18 adam qaza taýyp, otyzdan astam kisi jaraqat aldy. Politsiia sherýshilerdi taratý úshin rezeńke oq pen jas aǵyzatyn gaz qoldandy.
