Qazaqstanda mýzeiler men kitaphanalarǵa tabys tabýǵa múmkindik beriledi. Bul týraly Senattyń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy "Ult aqparat".
«Qoldanystaǵy «Mádeniet týraly» zańda mýzeiler men kitaphanalar iske asyrýǵa quqyly aqyly qyzmet túrleriniń tizimi jáne olardan paida tabý tártibi qarastyrylǵan. Tizim sol kezde memlekettik mekeme nysanynda jumys istegen kitaphanalar men mýzeilerge quqyq berý úshin zańǵa engizilgen bolatyn. Biýdjet zańnamasynyń talaptaryna sáikes, eger aqyly qyzmetter quqyǵy salalyq zańdarda kózdelmese, kommertsiialyq emes bolyp tabylatyn memlekettik mekemelerdiń nysanynda qurylǵan uiymdardyń bundai qyzmetke quqyǵy joq», - dedi «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» QR Zańynyń jobasy jóninde baiandama jasaǵan ministr.
Alaida, onyń aitýynsha, búgingi kúni Qazaqstannyń kóptegen mýzeileri memlekettik kásiporyndarǵa ainalǵan. Osy oraida, qoldanystaǵy zańda mýzeiler men kitaphanalarǵa tabys tabýǵa múmkindik beretin norma kásiporyndardyń aqyly qyzmetter kórsetý aiasyn shektep otyr.
«Osyǵan orai zań jobasynda osy normanyń qoldanylýyn mekemeler túrinde qurylǵan uiymdarǵa ǵana qoldaný usynylyp otyr. Kásiporyndar «Memlekettik múlik týraly» Zańynyń talaptarynyń aiasynda iske asyratyn bolady. Sonymen qatar, osy zań jobasy aiasyndaǵy eń mańyzdy normalardyń biri, ol memleket júz paiyz qatysatyn uiymdardy jekeshelendirýge tyiym salatyn túzetý bolyp tabylady», - dedi Aqtoty Raiymqulova.
