“Qarnymnyń ashqanyna emes, qadirimniń qashqanyna jylaimyn” degendei, bizdiń de gazetke hat jazýymyzdan basqa amal qalmady. Óitkeni qurǵaq ýádege toiyp bittik. 1998 jyly Ońtústik Qazaqstan oblysy, Saryaǵash aýdany, Qurkeles aýlynda meshit ashyldy. Qazaqtyń aiboz uly, shyǵys jekpe-jek ónerin elimizge alyp kelgen Mustafa Óztúriktiń esimi berilgen Alla úiinde jamaǵat búginge deiin qulshylyq etip keledi. Endi mine, ashylǵanyna 20 jyl jýyqtaǵan meshitimiz tozyp bitti. “Aýyl turǵyndarynyń pitir, sadaqasynan túsetin qarajat eshteńege jetpeidi. Kásipkerlerden kómek, memleketten qoldaý bolmaǵandyqtan meshit kún ótken saiyn tozyp barady” dep Qurkeles aýylynyń bir top turǵyny tiisti oryndarǵa hat ta joldady. Biraq eshqandai nátije joq.
Mustafa Óztúrik atyndaǵy Qurkeles aýylyndaǵy meshittiń ishi-syrtyn sylap, árlep, áktep, shatyryn sý ótpeitindei etip qaita jabý kerek. Oǵan qosa, aiazdy kúnderi namaz oqyǵanda azynaǵan sýyq qaryp, qart adamdar shydai almaidy. Sol sebepti aýyl turǵyndary meshitke jylytý júiesi qaita júrgizilse deidi. Meshittiń ainalasyn mal kirmeitindei etip qorshap, balalar namaz oqyp-úirenetin arnaiy bólme ashylsyn degendi de tilge tiek etip otyr aýyl halqy. Jańbyrly kúnderi meshitke jetý aýyl turǵyndary úshin muńǵa ainalady. Sebebi, asfalt tóselmegen joldyń mi batpaǵy shyǵyp, laisańǵa belsheden batasyń. Tún ishinde qarańǵy kóshemen júrý de aýyl turǵyndary úshin qiyndyq týǵyzyp otyr. Ásirese, Oraza aiy kezinde, taraýyqtan qaitqan jamaǵat úshin qarańǵy kóshemen júrý qiyn soǵatyny aitpasa da túsinikti.
Shyǵys jekpe-jegi óneriniń has sheberi, aqiqattyń jolynda altyn basyn eshkimge imei ketken Mustafa Óztúriktiń alpys jyldyǵyn atap ótý týraly máseleni eki jyl buryn buqaralyq aqparat quraldary arqyly kótergenbiz. Talǵar aýdanyna qarasty Besaǵash aýylyndaǵy Mustafa Óztúrikke 2004 jyly stýdent músinshiniń qoiǵan qýyrshaq eskertkishi de sol kezde aýystyrylǵan bolatyn. Endi mine, Mustafa Óztúriktiń esimi berilgen kieli orynǵa da úlken qoldaý qajet. Kúni erteń Mustafanyń atyndaǵy meshittiń qabyrǵasy qulap (betin aýlaq qylsyn), tóbesinen sý sorǵalap tursa, eldigimizge syn bolmai ma?!
Osy jaitty aityp, bas múfti Erjan qajy Malǵajyulynyń da qabyldaýynda boldym. Qurkeles aýylyndaǵy jamaǵattyń duǵai-duǵai ótinishin de aittym. Bas múfti bul máseleni “zertteidi, túitkildi sheshedi” dep kómekshisine tapsyrǵan bolatyn. Sodan beri segiz aiǵa jýyqtady, biraq eshqandai qozǵalys joq.
Múftiiat osy máseleni oń sheship berse, Mustafa Óztúriktiń arýaǵy razy bolyp, aýyl turǵyndarynyń da kúpti kóńili seiiletin edi. Alla úiiniń jarqyrap turǵany árkim úshin de maqtanysh emes pe?! “Tozyǵy jetken meshit qulapty” degen sóz estý, bárimiz úshin de aýyr tiedi ǵoi.
Eskirgen meshitti jańalap salyp berýdi Múftiiatqa, Bas múftige ǵana ótinish etip otyrǵan joqpyz. Bul máselege aýyldan shyqqan jekelegen kásipkerler nemese ózge de atymtai-jomart azamattar qol ushyn sozyp, qoldasa durys bolar edi. “Mustafa Óztúriktiń aty berilgen meshitti Múftiiat bas bolyp, eldiń atymtai-jomart azamattary qarjylai qoldaý kórsetip salyp berdi” dep Qurkeles aýylynyń turǵyndary maqtanyp júrse, qandai ǵanibet!
Berik qajy ÁDIEV,
Almaty qalasy
"Jas Alash" gazeti
