“قارنىمنىڭ اشقانىنا ەمەس, قادiرiمنiڭ قاشقانىنا جىلايمىن” دەگەندەي, بiزدiڭ دە گازەتكە حات جازۋىمىزدان باسقا امال قالمادى. ٶيتكەنi قۇرعاق ۋەدەگە تويىپ بiتتiك. 1998 جىلى وڭتٷستiك قازاقستان وبلىسى, سارىاعاش اۋدانى, قۇركەلەس اۋلىندا مەشiت اشىلدى. قازاقتىڭ ايبوز ۇلى, شىعىس جەكپە-جەك ٶنەرiن ەلiمiزگە الىپ كەلگەن مۇستافا ٶزتٷرiكتiڭ ەسiمi بەرiلگەن اللا ٷيiندە جاماعات بٷگiنگە دەيiن قۇلشىلىق ەتiپ كەلەدi. ەندi مiنە, اشىلعانىنا 20 جىل جۋىقتاعان مەشiتiمiز توزىپ بiتتi. “اۋىل تۇرعىندارىنىڭ پiتiر, ساداقاسىنان تٷسەتiن قاراجات ەشتەڭەگە جەتپەيدi. كەسiپكەرلەردەن كٶمەك, مەملەكەتتەن قولداۋ بولماعاندىقتان مەشiت كٷن ٶتكەن سايىن توزىپ بارادى” دەپ قۇركەلەس اۋىلىنىڭ بiر توپ تۇرعىنى تيiستi ورىندارعا حات تا جولدادى. بiراق ەشقانداي نەتيجە جوق.
مۇستافا ٶزتٷرiك اتىنداعى قۇركەلەس اۋىلىنداعى مەشiتتiڭ iشi-سىرتىن سىلاپ, ەرلەپ, ەكتەپ, شاتىرىن سۋ ٶتپەيتiندەي ەتiپ قايتا جابۋ كەرەك. وعان قوسا, ايازدى كٷندەرi ناماز وقىعاندا ازىناعان سۋىق قارىپ, قارت ادامدار شىداي المايدى. سول سەبەپتi اۋىل تۇرعىندارى مەشiتكە جىلىتۋ جٷيەسi قايتا جٷرگiزiلسە دەيدi. مەشiتتiڭ اينالاسىن مال كiرمەيتiندەي ەتiپ قورشاپ, بالالار ناماز وقىپ-ٷيرەنەتiن ارنايى بٶلمە اشىلسىن دەگەندi دە تiلگە تيەك ەتiپ وتىر اۋىل حالقى. جاڭبىرلى كٷندەرi مەشiتكە جەتۋ اۋىل تۇرعىندارى ٷشiن مۇڭعا اينالادى. سەبەبi, اسفالت تٶسەلمەگەن جولدىڭ مي باتپاعى شىعىپ, لايساڭعا بەلشەدەن باتاسىڭ. تٷن iشiندە قاراڭعى كٶشەمەن جٷرۋ دە اۋىل تۇرعىندارى ٷشiن قيىندىق تۋعىزىپ وتىر. ەسiرەسە, ورازا ايى كەزiندە, تاراۋىقتان قايتقان جاماعات ٷشiن قاراڭعى كٶشەمەن جٷرۋ قيىن سوعاتىنى ايتپاسا دا تٷسiنiكتi.
شىعىس جەكپە-جەگi ٶنەرiنiڭ حاس شەبەرi, اقيقاتتىڭ جولىندا التىن باسىن ەشكiمگە يمەي كەتكەن مۇستافا ٶزتٷرiكتiڭ الپىس جىلدىعىن اتاپ ٶتۋ تۋرالى مەسەلەنi ەكi جىل بۇرىن بۇقارالىق اقپارات قۇرالدارى ارقىلى كٶتەرگەنبiز. تالعار اۋدانىنا قاراستى بەساعاش اۋىلىنداعى مۇستافا ٶزتٷرiككە 2004 جىلى ستۋدەنت مٷسiنشiنiڭ قويعان قۋىرشاق ەسكەرتكiشi دە سول كەزدە اۋىستىرىلعان بولاتىن. ەندi مiنە, مۇستافا ٶزتٷرiكتiڭ ەسiمi بەرiلگەن كيەلi ورىنعا دا ٷلكەن قولداۋ قاجەت. كٷنi ەرتەڭ مۇستافانىڭ اتىنداعى مەشiتتiڭ قابىرعاسى قۇلاپ (بەتiن اۋلاق قىلسىن), تٶبەسiنەن سۋ سورعالاپ تۇرسا, ەلدiگiمiزگە سىن بولماي ما?!
وسى جايتتى ايتىپ, باس مٷفتي ەرجان قاجى مالعاجىۇلىنىڭ دا قابىلداۋىندا بولدىم. قۇركەلەس اۋىلىنداعى جاماعاتتىڭ دۇعاي-دۇعاي ٶتiنiشiن دە ايتتىم. باس مٷفتي بۇل مەسەلەنi “زەرتتەيدi, تٷيتكiلدi شەشەدi” دەپ كٶمەكشiسiنە تاپسىرعان بولاتىن. سودان بەرi سەگiز ايعا جۋىقتادى, بiراق ەشقانداي قوزعالىس جوق.
مٷفتييات وسى مەسەلەنi وڭ شەشiپ بەرسە, مۇستافا ٶزتٷرiكتiڭ ارۋاعى رازى بولىپ, اۋىل تۇرعىندارىنىڭ دا كٷپتi كٶڭiلi سەيiلەتiن ەدi. اللا ٷيiنiڭ جارقىراپ تۇرعانى ەركiم ٷشiن دە ماقتانىش ەمەس پە?! “توزىعى جەتكەن مەشiت قۇلاپتى” دەگەن سٶز ەستۋ, بەرiمiز ٷشiن دە اۋىر تيەدi عوي.
ەسكiرگەن مەشiتتi جاڭالاپ سالىپ بەرۋدi مٷفتيياتقا, باس مٷفتيگە عانا ٶتiنiش ەتiپ وتىرعان جوقپىز. بۇل مەسەلەگە اۋىلدان شىققان جەكەلەگەن كەسiپكەرلەر نەمەسە ٶزگە دە اتىمتاي-جومارت ازاماتتار قول ۇشىن سوزىپ, قولداسا دۇرىس بولار ەدi. “مۇستافا ٶزتٷرiكتiڭ اتى بەرiلگەن مەشiتتi مٷفتييات باس بولىپ, ەلدiڭ اتىمتاي-جومارت ازاماتتارى قارجىلاي قولداۋ كٶرسەتiپ سالىپ بەردi” دەپ قۇركەلەس اۋىلىنىڭ تۇرعىندارى ماقتانىپ جٷرسە, قانداي عانيبەت!
بەرiك قاجى ەديەۆ,
الماتى قالاسى
"جاس الاش" گازەتٸ
