Din isteri jáne azamattyq qoǵam ministrliginiń Azamattyq qoǵam isteri jónindegi Komitet tóraǵasynyń burynǵy orynbasary Baýyrjan Mýsinge qatysty sot úkimi shyqty, - dep habarlaidy Tengrinews.kz tilshisi Astana sotynyń baspasóz qyzmetine silteme jasap.
"2018 jyldyń 16 sáýirinde Astana qalalyq Almaty aýdandyq №2 soty Din isteri jáne azamattyq qoǵam ministrliginiń Azamattyq qoǵam isteri jónindegi Komitet tóraǵasynyń burynǵy orynbasary Baýyrjan Mýsinge qatysty Kolpakovtan Assar KZ JShS múddesi úshin 1 000 000 teńge jáne jeke kásipker Qulsharievten 400 000 myń teńge para alý deregi boiynsha sot úkimin shyǵardy", - dep habarlady sottaǵylar.
Istiń fabýlasy boiynsha, 2016 jyldyń 15 jeltoqsanynda komitet tóraǵasynyń orynbasary Mýsin men Assar KZ JShS direktory arasynda jalpy somasy 4 900 000 teńgege memlekettik satyp alý kelisimsharty jasalǵan. Sottyń málimetinshe, Mýsin Kolpakovtan jetkizip berilmegen taýardy qabyldap alý aktisine qol qoiǵany úshin 1 000 000 teńge para alǵan.
"Sonymen qatar, Mýsin jeke kásipker E.G.Qulsharievten 2017 jyldyń sáýirinde ótken seminardy ótkizýge qatysýy úshin "Qulshariev E." JK múddesin lobbilegeni jáne josparlanǵan satyp alýlarda ony jeńimpaz dep taný úshin 400 000 teńge para alǵan", - dep habarlady baspasóz qyzmetindegiler.
Sot úkimimen Baýyrjan Mýsin 7 jylǵa bas bostandyǵynan aiyryldy. Ol jazasyn qaýipsizdigi ortasha qylmystyq-atqarý júiesi mekemesinde óteidi, sondai-aq, ol memlekettik qyzmetke kelý jáne memlekettik qyzmetpen ainalysý quqyǵynan ómir boiyna aiyryldy. Sot úkimi zańdy kúshine engen joq.
Eske sala keteiik, Din isteri jáne azamattyq qoǵam ministrliginiń komitet basshysynyń orynbasary Baýyrjan Mýsin biyl 31 naýryzda ustalǵan edi. Baspasóz qyzmeti ókilderiniń aitýynsha, B.Mýsin kásipkerden paranyń kezekti 400 myń teńge somasyndaǵy bóligin alý ústinde ustalyp, Astana qalalyq IID ýaqytsha ustaý izoliatoryna qamalǵan. Paranyń jalpy somasy - 1,4 million teńge.
