Bir banktegi aqaý osaldyq QR zańnamasyna qaishy áreket retinde baǵalanbaýy kerek. Bul pikirdi QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Bul - jeke aqparattyq júie. Eger jeke derekterdi óńdeýge jáne zańsyz paidalanýǵa qatysty naqty shaǵymdar bolsa, biz óz ókilettigimiz aiasynda jaýap qatamyz. Tiisinshe, qazir jeke derekterdiń taralýy nemese QR azamattaryna jeke derekterdi teris paidalaný boiynsha zardap kelgeni týraly aqparat joq. Biz arnaiy is-shara ótkizgen joqpyz, biraq aqparattyq ortada túrli jaǵdai bolatynyn eske salǵym keledi. Eger joldarda kólik júrse, apat bolady. Sondyqtan dál osy maqsatta aqparattyq qaýipsizdik komiteti qurylǵan», - dedi ministr Ortalyq kommýnikatsiialar qyzmetinde ótken brifingte.
Onyń aitýynsha, qandai da bir oqiǵalar oryn alsa, ministrlik jaýap beredi.
«Bir banktegi aqaý tutas osaldyq nemese QR zańnamasyna qaishy keletin áreket retinde baǵalanbaýy kerek dep esepteimiz», - dep atap ótti Baǵdat Mýsin.
«Bul – ekinshi deńgeili bankterdiń QR azamattary aldyndaǵy azamattyq-quqyqtyq jaýapkershiligi. Eger qandai da bir qaýipter týyndasa, olar júiege kirýdi ýaqytsha toqtatyp, máselelerin sheshedi. Kez kelgen aqparattyq júie jáne kez kelgen ekinshi deńgeili bank nemese elektrondy úkimet portaly – derbes nysandar. Onda másele týyndasa, standart boiynsha belgili bir áreketterdi jasaýy qajet. Bizdiń ministrlik aqparattyq qaýipsizdikke jaýapty organ, eger aqparattyq qaýipsizdik boiynsha shaǵymdar bolsa, biz de shara qabyldaýǵa mindettimiz», - dep túsindirdi B.Mýsin.
Eske sala keteiik, 28 qazanda Kaspi.kz operatsiialarynda tehnikalyq aqaýlar oryn alǵan edi. Bank ókilderi ony tezirek joiýǵa ýáde berdi.
