Tanymal biznesmen Murathan Toqmádi 2004 jyly bankir Erjan Tátishevti óltirgenin moiyndady. Búgin Jambyl oblysy boiynsha qylmystyq ister jónindegi mamandandyrylǵan aýdanaralyq sotta Toqmádi isi qarala bastady. Ol sot aldynda jaýap berip, qylmysyn moiyndady. Jasaǵan isine ókinetinen de aitty, dep habarlaidy Baq.kz tilshisi.
Isti sýdia Azamat Tilepov qarap jatyr. Biznesmen 1997 jylǵy redaktsiiadaǵy QK 96-baptyń 2-tarmaǵynyń "j", "z" pýnkteri (aldyn ala kelisip, toppen qasaqana adam óltirý) boiynsha aiyptalyp otyr.
«Iá, men kinámdi moiyndaimyn. Jasaǵan isime ókinemin», - dedi Toqmádi.
Murathan Toqmádi óz áreketterine onyń otbasyna Muhtar Áblázov tarapynan jasalǵan qoqan-loqqy men aqshalai syiaqy yqpal etkenin aitty. Sondai-aq, jaqyndary úshin qoryqqanyn jetkizdi.
«Ol (Áblázov-avt.) qoqan-loqqy kórsetti. Otbasym bul qysymnan qoryqty» - dedi Toqmádi.
Biznesmen Muhtar Áblázovten Erjan Tátishevti óltirý úshin 2 transhpen 4 mln dollar kóleminde syiaqy alǵanyn da jasyrmady. Bul qarjy 2004 jáne 2005 jyldary aýdarylǵan.
Eske sala ketsek, 2017 jylǵy 12 maýsymda Almatydaǵy arnaiy operatsiia barysynda «QazStroiSteklo» JShS bas direktorynyń keńesshisi Murathan Toqmádi ustaldy. Biznesmen «Iri kólemdegi múlikke ie bolý maqsatynda bopsalaý» baby boiynsha qylmys jasady degen kúdikpen quryqtaldy. Kásipker 2005 jyly «Semýriýjkom» jáne «Kazstroisteklo» JShS teń quryltaishysyna qoqan-loqqy kórsetip, aqsha bopsalap, kásipkerlerdiń jarǵylyq qorynyń úlesterin iemdengen. Ol osyndai áreketterimen 185 million teńge kóleminde shyǵyn keltirýi múmkin edi. Osylaisha, sot Murathan Toqmádidi úsh jylǵa bas bostandyǵynan aiyrdy.
Budan keiin 2017 jylǵy qazanda KTK telearnasynda derekti film kórsetilip, onda Toqmádi «Bank Turan Álem» AQ-tyń burynǵy tóraǵasy Erjan Tátishevti óltirgenin moiyndady. Ol Tátishevti óltirýge Muhtar Áblázov tapsyrys bergenin aitty. Osylaisha, Áblázov Erjan Tátishevtiń óliminen keiin BTA bankin basqarǵan. Buǵan deiin tergeý barysynda Murathan Toqmádi Tátishevtiń basyna abaisyzda oq atty degen qorytyndyǵa kelgen bolatyn. Keiinnen dálelderdiń arqasynda Tátishev abaisyzda oq atqannan emes, qasaqana oq atqannan qaitys bolǵany anyqtaldy. Osylaisha, Jambyl oblystyq sotyna Toqmádige qatysty úkimdi joqqa shyǵarýǵa negizdiń bar ekeni jaily qorytyndy joldanyp, jańa derekterdiń paida bolýyna bailanysty qylmystyq is qaita qarala bastady.
