Senator Murat Baqtiiaruly «Eńbek» memlekettik baǵdarlamasynyń júzege asý barysyn synǵa aldy. Depýtattyń esepteýinshe bul baǵdarlamany tolyq ózgertý kerek, dep habarlaidy "Ult aqparat".
«Jyl saiyn jumyspen qamtýǵa qanshama qarajat jumsaǵanymyzben jumyspen qamtylǵandar azaimai, eńbek naryǵyndaǵy ahýal durystala qoiǵan joq. 2019 jyly ataýly áleýmettik kómek alýshylar sany 2 millionnan asyp ketti. Jalpy bizdiń pikirimizshe, «Eńbek» - halyqqa áleýmettik kómek beretin baǵdarlama emes, jumys izdeýshilerdi, naryqqa qajetti jumysshy mamandyqtardy oqytyp, olarǵa jumys oryndaryn ashýǵa tiisti edi. Ókinishke qarai bul baǵytta nátije az. Mysaly nátijeli jumyspen qamtýdyń jáne kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyn júzegea asyrý úshin 2017 jyldan beri 186 mlrd teńge bólinip, 40 myńǵa jýyq nesie berilgen», - dedi Murat Baqtiiaruly Parlament Senatynyń otyrysynda.
Onyń aitýynsha osy baǵdarlama sheńberinde oqytylǵan 80 myń adamnyń 23 myńy ǵana mamandyǵyna sai jumysqa ornalasqan. Sáikesinshe 6 mlrd teńge naryqta suranysy joq mamandyqtardy oqytýǵa jumsalǵan. Senatordyń esepteýinshe tiimdiligi syn kótermeitin «Eńbek» baǵdarlamasyna tereń taldaý jasap, qajet bolǵan jaǵdaida bul baǵdarlamany tolyq ózgertý kerek.
«2019 jyly azyq-túlik taýarlarynyń baǵasynyń ósýi halyqtyń aqshalai shyǵystarynyń qurylymynda 50 paiyzdy aldy. Al damyǵan elderde bul kórsetkish 10 paiyz sheginde ǵana. Iaǵni halqymyzdyń tapqan tabysy azyq-túlik alýǵa ǵana ketip jatyr. Halyqtyń qaryzǵa kirýi áleýmettik problemalarǵa ákep soqtyrýy múmkin. Demek elimizdegi azamattardyń tómengi kúnkóris deńgeii men eń tómengi jalaqy mólsheri qazirgi jaǵdaiǵa sáikes kelmeidi», - dedi ol.
Osy máselelerge bailanysty senator Úkimetke eń tómengi jalaqyny qazirgi ómir talaptaryna sáikestendirýdi tez arada qolǵa alýdy surady.
