Memleket basshysy Qasym-Jomart Toqaev aqyly joldardyń jelisin keńeitý týraly pikir bidirdi, dep habarlaidy "Ult aqparat".
«Avtomobil joldarynyń sapasy eldiń kólik áleýetin arttyrýda sheshýshi ról atqarady. Bul rette, joldardy jóndeý sapasy burynǵysynsha ádil synǵa ushyrap jatyr. Bul - ásirese aqyly joldarǵa qatysty ózekti másele», - dedi Prezident Úkimettiń keńeitilgen otyrysynda.
Prezident osy máselege qatysty júk kólikteri ieleriniń tarapynan týyndaǵan narazylyq týraly da oiyn aitty.
«Buǵan jaqynda bolǵan júk kólikteri men tasymaldaýshylardyń narazylyǵy dálel. Aqyly joldardy engizý – bul búkilálemdik tájiribege sáikes keletin durys sheshim. Mundai úlken elde tek biýdjet esebinen ǵana jol salý múmkin emes. Sonymen qatar, Qazaqstan tranzitten aqsha tabýǵa tiis. Biraq bul úshin mundai joldardyń sapasy joǵary bolýy jáne jol boiyndaǵy minsiz qyzmetti qamtamasyz etý mańyzdy. Biznes pen azamattar jol infraqurylymynyń jańa sapasyn sezinýi kerek. Úkimetten bul máseleni erekshe baqylaýda ustaýdy suraimyn», - dedi Memleket basshysy.
