Mádeniet jáne aqparat ministri Aida Balaeva prokaty bir aptaǵa uzartylǵan "Mirjaqyp. Oian, qazaq!" filmine qatysty pikir bildirdi, - dep habarlaidy "Ult aqparat".
Úkimet brifinginde jýrnalister ministrden "zal toly kórermen jinaǵanyna qaramastan, filmniń prokaty basqa kinotýyndylarǵa qaraǵanda nege qysqa bolǵanyn" surady.
"Barlyq prokattyq uiymnyń óz kestesi bar. Biz mundai dúrligý bolady dep oilaǵan joqpyz. Shynynda da, ýaqyty aldyn ala tańdaldy. Kórermender osy filmniń kórsetilimi odan ári jalǵasqanyn qalaǵan soń, taǵy bir aptaǵa uzarttyq.
Qazir prokat ýaqyty aiaqtaldy. Kórermenderin kútip turǵan basqa da filmder bar. Sol sebepti bul jerde qandai da bir problema bar dep oilamaimyn.
Paradoks sol - bul film Qazaqstan telearnasynda úsh ret kórsetildi, biraq erekshe qyzyǵýshylyq bolmady. Qazir bul film kópshilikke qoljetimdi. Ony YouTube-arnadan kórýge bolady. Sondyqtan men munda eshqandai problema kórip turǵan joqpyn", - dedi ministr jýrnalisterdiń suraqtaryna jaýap bere otyryp.
Balaevanyń aitýynsha, qazaqstandyqtardyń bul filmge degen qyzyǵýshylyǵy joǵary.
"Árine, qazaqstandyq serialdar da tabysty bolsa degen úmit bar. Buǵan deiin bizde tek nashar jáne sapasy tómen ónimder túsiriledi degen stereotip bolǵan. Bizdiń rejisserler men prodiýserlik kompaniialar da maqtaýǵa laiyqty filmder túsire alady", - dedi ministr.
