Munai-gaz salasyndaǵy jergilikti qamtý úlesin ulǵaitýǵa múmkindik beretin eki bastama júzege asyrylyp jatyr. Bul týraly QR Energetika ministrliginiń alqa májilisinde vedomstvo basshysy Nurlan Noǵaev aitty, dep habarlaidy QazAqparat.
«2020 jyldyń qorytyndysy aiasynda kómirsýtek shikizaty jáne ýran óndirý boiynsha jer qoinaýyn paidalanýshylardyń taýarlaryn, jumystary men kórsetiletin qyzmetterin (TJKQ) satyp alýdyń jalpy kólemi shamamen 5,4 trln teńge boldy. Sonymen qatar, otandyq qamtý atalǵan satyp alýda 46 paiyzdy qurady. Pandemiia kezinde jergilikti kásipkerlerdi memlekettik qoldaý aiasynda jer qoinaýyn paidalanýshylardyń jáne olardyń merdigerleriniń kómirsýtekterdi barlaý nemese óndirý ári ýran óndirý jónindegi operatsiialardy júrgizý kezinde paidalanylatyn taýarlardy, jumystardy jáne kórsetiletin qyzmetterdi satyp alý qaǵidalaryna ózgerister engizildi. Bul ózgerister jer qoinaýyn paidalanýshylarǵa qazaqstandyq taýarlardy konkýrstyq rásimderdi ótkizbesten, bir kózden satyp alýǵa múmkindik berdi», - dedi ministr.
Onyń aitýynsha, qazirgi ýaqytta Ministrlik munai-gaz salasyndaǵy jergilikti qamtý úlesin ulǵaitýǵa múmkindik beretin eki bastamany júzege asyryp otyr:
birinshisi – Jergilikti qamtýdy damytýdyń tikelei investitsiialar qoryn qurý, sonyń ishinde otandyq IT ázirlemelerin ilgerletý;
ekinshisi - Halyqaralyq munai-gaz mashinasyn jasaýdy damytý jónindegi ortalyq qurý.
«10 jyl ishinde elimizdiń jalpy ishki ónimine Qor qyzmetiniń oń áseri shamamen 642 mln AQSh dollaryn quraityn bolady, al Halyqaralyq ortalyq 3 iri Operatordyń (NKOK, KPO jáne TShO) qajettiligi úshin servistik kompaniialardyń/ jergilikti óndirýshilerdiń taýarlar men kórsetiletin qyzmetterdi óndirý men jetkizýde kemshilikterin joiýǵa múmkindik beredi», - dedi N. Noǵaev.
