Munai-gaz jobalaryn iske asyrýdyń 2022-2025 jyldar kezeńinde 2,5 myń turaqty jáne 12 myń ýaqytsha jumys orny qurylady. Bul Energetika ministri Bolat Aqsholaqov aitty, dep habarlaidy QazAqparat.
«Otandyq óndiris ónimderiniń básekege qabilettiligin tabysty arttyrýdyń negizgi faktorlarynyń biri retinde biz otandyq jobalaý, injiniringtik kompaniialardyń quzyretin arttyrý boiynsha qajetti jaǵdailar jasaýdy kórip otyrmyz. Bul jobalaý kezeńinde, árine, tapsyrys berýshiniń baǵa jáne sapa saiasatyna sáikes kelgen jaǵdaida, jergilikti taýarlardy jetkizýdi qamtamasyz etýge múmkindik beredi. Qazirgi ýaqytta Qarashyǵanaq ken ornynda shiki gazdy keri aidaýdyń qosymsha 5-shi kompressoryn engizýdi eskerip, jylyna 10-11 mln tonna sheginde suiyq kómirsýtekterdi óndirý deńgeiin odan ári qoldaýǵa baǵyttalǵan joba iske asyrylyp otyr», - dedi B.Aqsholaqov.
Onyń aitýynsha, bul jobanyń bazalyq jobalaýyn qazaqstandyq «Qazgiproneftetrans» jobalaý institýtymen seriktestikte Worley Parsons sheteldik kompaniiasy oryndady.
«Jobalaý kezeńinde de, qurylys kezeńinde de birlesken kásiporyndar qurý nátijesinde bizdiń azamattar úshin 793 jumys orny quryldy. Jyl sońyna deiin qosymsha 1 400 qyzmetker tartylatyn bolady. 2023 jyly 2550-ge jýyq azamatqa jumys orny josparlanyp otyr», - dedi ministr.
Onyń sózine qaraǵanda, taǵy bir iri joba boiynsha Qashaǵan bazalyq jobalaýǵa Qazaqstan-Aýstriia-Frantsiia birlesken kásiporny Caspian Experts JV JShS kelisimshart berdi. Qazir jobalaý jumystaryna tartylǵan 120 jergilikti jumysshy bar. Jalpy, 2A fazasyn iske asyrý kezinde shamamen 1 200 jumys orny qurylady.
«Jańa óndiristerdi oqshaýlaý boiynsha jobalardan basqa, ministrlik munai-gaz himiiasy klasterin qurý jumystaryn júrgizilip jatyr. Onda Atyraý men Batys Qazaqstan oblystarynda júzege asyrylatyn 7 jobany iske asyrý kózdelgen. Atap aitqanda, biyl qýattylyǵy jylyna 500 myń tonna polipropilen óndiretin zaýyt iske qosylady. Ótken jyly Qashaǵanda qýattylyǵy 1 mlrd tekshe metr bolatyn gaz óńdeý zaýytynyń qurylysy bastaldy. Onyń aiaqtalý merzimi 2024 jylǵa josparlanǵan. Sondai-aq, qýaty jylyna shamamen 1 mln tonna polietilentereftalat, qýaty jylyna 1,25 mln tonna polietilen jáne qýaty jylyna 186 myń tonna býtadien óndirý jónindegi mynadai iri jobalardy iske asyrýǵa nazar aýdarylatyn bolady. Osy jobalardy iske asatyn 2022-2025 jyldar kezeńinde 2,5 myń turaqty jáne 12 myń ýaqytsha jumys oryndaryn qurý eskerilgen», - dedi vedomstvo basshysy.
«Bul jobalarǵa quiylǵan investitsiia kólemi 4,9 mlrd teńgeni quraidy», - dep naqtylady ministr.
