Ulttyq bank tóraǵasy Erbolat Dosaev álemdik naryqtarda munai baǵasy qaitadan ósip kele jatqanyn málim etti, dep habarlaidy "Ult aqparat".
«Biyl mamyrda syrtqy naryqtarda kóptegen elde koronavirýstyń ósiminiń tómendeýine jáne birtindep karantinnen shyǵýǵa bailanysty jaǵymdy kóńil-kúi basym boldy. Karantin sharalaryn báseńdetý ekonomikalyq belsendiliktiń jáne energiia resýrstaryna suranystyń qaita jańǵyrýyna yqpal etip otyr. OPEK+ munai óndirisin qysqartý týraly ýaǵdalastyǵyn iske asyrý esebinen munai naryǵyndaǵy teńgerimdilik birtindep rettelýde. Mamyrda munaiǵa baǵa belgileý bir barrel úshin 25,3 AQSh dollarynan 35,3 AQSh dollaryna deiin, iaǵni 39,8%-ǵa ósti. Al 8 maýsymdaǵy jaǵdai boiynsha álemdik naryqtarda munaidyń bir barreli 40,8 AQSh dollary deńgeiinde jabyldy», - dedi Erbolat Dosaev Úkimet otyrysynda.
Ulttyq bank tóraǵasynyń aitýynsha memleketterdiń kóbi karantin sharalaryn alyp tastai bastaǵan.
«Máselen, Global PMI Manufacturing indeksi 2020 jylǵy mamyrda 39,6-dan 42,4-ke deiin ósti. Tómendeý barlyq kórsetkishter – shyǵarý kólemi, jańa tapsyrystar, jańa eksporttyq tapsyrystar jáne jumyspen qamtý boiynsha baiaýlady. Keibir jandaný belgilerin biz Qazaqstan ekonomikasynda da Ulttyq bank ai saiyn baǵalaityn Iskerlik belsendilik indeksi negizinde kórip otyrmyz. 447 iri, orta jáne shaǵyn kásiporynǵa júrgizilgen pikirterim nátijesi boiynsha ónerkásipte, qurylysta jáne qyzmet kórsetý salasynda iskerlik belsendilik indeksi sáýirdegi 37,2 tarmaqpen salystyrǵanda mamyrda 44,0 tarmaqqa deiin ósti. Biraq áli de 50 tarmaq belgisinen tómen bolyp qalyp otyr», - dedi ol.
Erbolat Dosaevtyń aitýynsha jaǵdaidyń edáýir jaqsarýy qyzmet kórsetý salasynda baiqalady.
