Majarstan tarapymen Túrkitildes memleketterdiń yntymaqtastyǵy keńesiniń aiasyndaǵy is-áreketti odan ári keńeitý jónindegi qadamdar talqylandy. Bul týraly Majarstan Syrtqy ekonomikalyq bailanystar jáne syrtqy ister ministri Peter Siiartomen kelissózderden keiin QR Premer-Ministriniń orynbasary – Syrtqy ister ministri Muhtar Tileýberdi málim etti, dep habarlaidy QazAqparat.
«Búgin Majarstannyń Syrtqy ekonomikalyq bailanystar jáne syrtqy ister ministri Peter Siiarto myrza resmi saparmen Qazaqstanǵa keldi. Majarstan – elimizdiń jaqyn odaqtasy, Ortalyq jáne Shyǵys Eýropa aimaǵyndaǵy elder ishinde bizben strategiialyq seriktestik ornatqan birden-bir memleket. Majar halqynyń bizben baýyrlas ekeni, qypshaqtarǵa qut meken bolǵany barlyqtaryńyzǵa belgili. Búgingi tańda Qazaqstan men Majarstan arasynda saiasi nemese ózge sipattaǵy qandai da bir kelispeýshilikter joq. Halyqaralyq mańyzdy máseleler boiynsha ustanymdarymyz sáikes keledi, elderimiz arasyndaǵy saiasi dialog joǵary deńgeide. Majarstan Qazaqstannyń halyqaralyq arenadaǵy barlyq bastamalary men kúsh-jigerin qoldaidy, bul ekijaqty ózara is-qimyldy odan ári damytý úshin qolaily jaǵdai jasaidy», - dedi M. Tileýberdi.
Onyń aitýynsha, Majarstan ministri Peter Siiarto myrzamen ashyqtyq pen ózara túsinistik rýhynda saiasi, saýda-ekonomikalyq jáne mádeni-gýmanitarlyq salalardaǵy Qazaqstan-Majarstan bailanystaryn, sondai-aq Túrkitildes memleketterdiń yntymaqtastyǵy keńesiniń (TMYK) aiasyndaǵy is-áreketti pandemiia jaǵdaiynda odan ári keńeitý jónindegi qadamdar talqylandy.
«Qazaqstan men Majarstan is-qimyl jasap, kúsh-jigerin jumyldyratyn ózara múddeli halyqaralyq sipattaǵy birqatar máseleler, onyń ishinde Qazaqstan azamattary úshin Eýropalyq Odaqtyń vizalyq rejimin jeńildetýge qatysty máseleler qaraldy», - dedi Muhtar Tileýberdi.
Budan buryn habarlanǵandai, búgingi kelessiózderden keiin taraptar eki el arasyndaǵy birneshe qujatqa qol qoidy.
Olardyń arasynda:
1. Damýǵa resmi kómek salasyndaǵy yntymaqtastyq boiynsha eki eldiń syrtqy saiasi vedomstvolary arasyndaǵy ózara túsinistik týraly Memorandým;
2. Qazaqstan Respýblikasynyń Syrtqy ister ministrligi janyndaǵy Syrtqy saiasi zertteýler institýty men Majarstannyń Syrtqy ekonomikalyq bailanystar jáne syrtqy ister institýty arasyndaǵy ózara túsinistik týraly Memorandým;
3. Qazaqstan Respýblikasynyń Mádeniet jáne sport ministrligi men Majarstannyń Adami resýrstar ministrligi arasyndaǵy 2021-2023 jyldarǵa arnalǵan mádeniet salasyndaǵy ózara yntymaqtastyq baǵdarlamasy bar.
