«Nur Otan» partiiasy Tóraǵasynyń Birinshi orynbasary Jambyl oblysyndaǵy kásiporyndardyń jumysymen tanysty. Jambyldyqtar Muhtar Qul-Muhammedke sút óndirisimen ainalysatyn 40-tan astam sharýa qojalyqtarynń basyn biriktiretin «Merke syr zaýyty» JShS kórsetti.
Jambyldyq fermerler Prezident tapsyrmasyn oryndaý úshin iri aýyl sharýashylyǵy kooperativterine birigipti.
«Memleket basshysynyń tapsyrmasy boiynsha jyl saiyn agrarlyq salany damytý úshin milliardtaǵan aqsha bólinedi. Ol qarajatty tiimdi igerý úshin shaǵyn sharýa qojalyqtary iri aýyl sharýashylyǵy kooperativterine birigýi tiis. Merke irimshik zaýyty 40-tan astam aýyl sharýashylyǵy kásiporyndaryn biriktiredi. Bul Prezident tapsyrmasyn oryndaýdyń jarqyn mysaly», - dep atap ótti Muhtar Qul-Muhammed.
Tarazda bolǵan «Nur Otan» partiiasy Tóraǵasynyń Birinshi orynbasary «Arai» turǵyn alqabyndaǵy kóp páterli úilerdiń qurylysy barysymen tanysty. Bes qabatty 19 úi «Nurly jer» jańa memlekettik turǵyn úi qurylysy baǵdarlamasy sheńberinde salynýda. Páterlerdiń bir bóligi «Baiterek Development», bir bóligi «Turǵyn úi qurylys jinaq bankisi» arqyly bólinýde, páterge kezekte turǵandar úshin de kommýnaldyq turǵyn úi qorynan sharshy metrler bólý qarastyrylǵan.
Muhtar Qul-Muhammedtiń aitýynsha, nurotandyqtar qurylys nysandaryn salý úshin biýdjetten bólingen qarjynyń tolyq igerilýi úshin bar kúshin salýy tiis; úiler barlyq tehnologiialyq normalarǵa sáikes salynyp, qonystanýshylar óz páterleriniń kiltterin belgilengen merzimde alýy kerek.. «Mańyzdy memlekettik baǵdarlamalardyń iske asyrylýyna partiialyq monitoring pen baqylaýdy ornatý partiia Tóraǵasynyń tikelei tapsyrmasy bolyp tabylady», - dep atap ótti Muhtar Qul-Muhammed.
"Ult aqparat"
