Búgin Qazaqstan Respýblikasynyń Tuńǵysh Prezidenti kúnine orai uiymdastyrylǵan saltanatty qabyldaý rásiminde «Nur Otan» partiiasy Tóraǵasynyń Birinshi orynbasary Muhtar Qul-Muhammed óz salasynda biik belesterdi baǵyndyrǵan talantty jastarǵa partiialyq biletterin tapsyrdy.
Muhtar Qul-Muhammed táýelsizdiktiń 26 jylynda Qazaqstan tutas bir ǵasyrǵa júk bolatyn jetistikterge jetkenin, álemdik qaýymdastyqtan oiyp turyp oryn alǵanyn, jahandyq deńgeidegi kúrmeýi qiyn ózekti máselelerdi sheshetin tiimdi alańǵa ainalǵanyn aityp, munyń bári Elbasymyzdyń eren eńbeginiń jemisi ekenine nazar aýdardy. Osyǵan orai partiia Tóraǵasynyń Birinshi orynbasary is-sharaǵa qatysqan jastardy Qazaqstan Respýblikasynyń Tuńǵysh Prezidenti kúnimen shyn júrekten quttyqtady.
Sondai-aq, Muhtar Qul-Muhammed jastarǵa ótkennen sabaq alyp, halqymyzdyń jarqyn sátterin jadymyzdan shyǵarmaýdyń mańyzy zor ekenin aitty.
– Jiyrmasynshy ǵasyr basynda patshalyq Reseidi mekendegen túrki halyqtary ishinde qazaq ultynyń ókilderi bilimdarlyq, qairatkerlik qabiletterimen airyqsha kózge tústi. Alashorda úkimetiniń tóraǵasy bolǵan Álihan Bókeihan Máskeý men Peterbordaǵy orys oqymystylary men demokratiialyq baǵyttaǵy qairatkerler arasynda erekshe bedelge ie boldy. Ortalyq Aziia tarihynda jariialanǵan tuńǵysh demokratiialyq memlekettik qurylym – Túrkistan avtonomiiasyn da Muhamedjan Tynyshpaev pen Mustafa Shoqai siiaqty Alash arystary kezektese basqardy. Tipti bul avtonomiia kúshpen taratylyp, onyń ornyna dúniege kelgen Túrkistan Keńestik Respýblikasynyń basshylyǵynda da Turar Rysqulov pen Názir Tórequlov siiaqty qazaq qairatkerleri boldy. Úrkerdei jarqyraǵan dál osyndai talanttar shoǵyryn sol kezdegi Orta Aziianyń birde bir ulty shyǵara alǵan joq. Átteń, repressiia zulmaty bolmasa Alash arystary osydan bir ǵasyr buryn-aq qazaq halqyn álemdik órkeniet biigine shyǵarar edi. Búgingi urpaq osyny umytpaýy kerek. Qazaqtyń ótken tarihta ketken esesin jańa zamannyń talantty jastary tolyqtyrady dep senemin, – dedi Muhtar Qul-Muhammed.
Aita keteiik, búgin «Nur Otan» partiiasynyń múshesi atanǵan talanttar qatarynda belgili ánshiler: Tóreǵali Tóreáli men Erke Esmahan, aýyr atletikadan Rio Olimpiadasynyń qola júldegeri Karina Goricheva, kásipqoi boksta el namysyn abyroimen qorǵap júrgen Janat Jaqiianov siiaqty tanymal jastar bar.
