Búgin QR Mádeniet jáne sport vitse-ministri Nurǵisa Dáýeshov Muhtar Áýezov atyndaǵy Qazaq memlekettik akademiialyq drama teatry ujymyna jańa direktordy tanystyrdy, dep habarlaidy "Ult aqparat".
QR Mádeniet jáne sport ministri Aqtoty Raiymqulovanyń arnaiy buiryǵymen 5 naýryzdan bastap teatrǵa ónertaný ǵylymdarynyń kandidaty, Qazaqstannyń eńbek sińirgen qairatkeri Erkin Tileýqululy Jýasbek basshylyq etedi.
«Sáttilik tileimiz! Talai jyl qyzmet etip, osy jerdiń ósý-órkendeýine atsalysyp kele jatyrsyz. Jalpy Qazaqstannyń teatr óneri salasynda eńbegińiz orasan zor. Sony ministrlik óte jaqsy baǵalap, ózińizge degen úlken jaýapkershilik, senim artyp, teatrdyń damýyna úles qosady degen nietpen sizdi taǵaiyndaýdy jón dep sanady. Qyzmetińiz qutty bolsyn. Bul laýazymnan kóri, artylǵan jaýapkershiliktiń júgi aýyr. Ujymmen birge jemisti qyzmet eterińizge senemiz», – dedi vitse-ministr.
Erkin Jýasbek 1965 jyly Jambyl oblysy Baizaq aýdany Sarybaraq aýylynda dúniege kelgen. 1982 jyly Almaty Memlekettik Teatr-kórkemsýret institýtynyń teatr fakýltetine «Drama jáne kino akteri» mamandyǵyna oqýǵa tústi.
Eńbek jolyn QR Ulttyq Ǵylym Akademiiasynyń M. Áýezov atyndaǵy Ádebiet jáne óner institýtynda aǵa laborant bolyp bastady.
1990-1993 jyldary osy institýttyń aspirantýrasynda oqydy. 1994 jyly teatrtaný salasy boiynsha kandidattyq dissertatsiia qorǵap, atalmysh institýtta ǵylymi qyzmetker bolyp jumys istedi.
1996-1997 jyldary qazaqtyń óner máselesi boiynsha ǵylymi Ortalyǵyna bólim meńgerýshi, 1997-1999 jyldary QR Bilim jáne mádeniet ministrligi Mádeniet komitetiniń «Teatr jáne kino» bóliminiń bastyǵy boldy.
1999-2001 jyldary Respýblikalyq Nemis drama teatrynyń direktory, 2001 jyly M. Áýezov atyndaǵy akademiialyq drama teatrynda ákimshilik direktory, 2004-2008 jyldary QR Teatr qairatkerleri Odaǵynyń tóraǵasy boldy.
2008 jyly jeltoqsannan 2013 jyly sáýirge deiin Astana qalasyndaǵy Q. Qýanyshbaev atyndaǵy mýzykalyq drama teatrynyń direktory, 2013 jyldyń 1 sáýirinen M. Áýezov atyndaǵy qazaqtyń memlekettik akademiialyq drama teatrynyń direktory-kórkemdik jetekshisi qyzmetine taǵaiyndaldy.
Erkin Jýasbektiń «Úilený», «Kúlemiz be, jylaimyz ba?», «Antivirýs» pesalary respýblika teatrlarynda qoiylyp keledi.
