Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankir Muhtar Ábiliazov pen onyń sybailastaryna qatysty qylmystyq isti qaraý odan ári jalǵasýda. Sottyń búgingi otyrysynda prokýrorlar BTA banktiń qyzmetkerleriniń atyna tirkelgen offshorlyq kompaniialardy nesieleýge qatysty qylmystyq áreketter sulbasyn jariia etti.
BTA banktegi zańsyz aila-sharǵylar, negizinen alǵanda, tikelei banktiń direktorlar keńesiniń tóraǵasy Muhtar Ábiliazovtyń óz qolymen jasalǵan stsenarii boiynsha júzege asyrylǵan. Atap aitqanda, 2007 jyly bank basshylyǵynyń tikelei nusqaýymen «Liter M» jaýapkershiligi shekteýli seriktestigi qurylady. Bul kompaniia aktsiialarynyń bir paiyzdyq úlesi №6 korporativtik biznes basqarmasynyń zańgeri Maksim Hablovtyń atyna tirkeledi. Atap aitarlyǵy, kýágerlerdiń sotta jariia etkenindei, birneshe milliondaǵan nesieler eshqandai kedergisiz berilip otyrǵan rezident bolyp tabylmaityn kompaniialardy tirkeýmen osy basqarma ainalysqan. Saiyp kelgende, Maksim Hablov jańadan qurylǵan kompaniianyń direktory bolyp kórsetilgen.
Al, «Liter M» jaýapkershiligi shekteýli seriktestiginiń qalǵan 99 paiyzdyq aktsiiasynyń úlesi Seishel araldarynda tirkelgen «Steiman Corp» kompaniiasyna tiesili bolǵan. Aita keterligi, offshorlyq kompaniianyń múddesin Qazaqstanda senimhatpen qorǵaý №6 korporativtik biznes basqarmasynyń qyzmetkeri Eleonora Sergoǵa júkteledi. Alaida, BTA banktiń nesie berý bóliminiń qyzmetkerleriniń eshqaisysy mundai «bir kúndik» offshorlyq kompaniialardyń qojaiyndaryn ómirde kórmegen.
«2007 jyldyń shilde aiynda Maksim Hablov BTA bankke 20,5 million AQSh dollary kóleminde nesie berýge ótinish jazady. Nesie alýdaǵy negizgi maqsat retinde ainalymdaǵy qarajattyń qoryn tolyqtyrý dep kórsetedi»,- dep áńgimeledi sot otyrysynda BTA banktiń ókili Talǵat Amantai. Bul joly da ádettegidei eshqandai qajetti taldaýlar jasalmastan, ótinish qanaǵattandyrylady. Tikelei Muhtar Ábiliazovtiń baqylaýyndaǵy nesie komiteti turaqty nesielik qujattardyń jáne tiisti múliktik kepildiń joqtyǵyna qaramastan, mundai nesielik ótinishterdi maquldap otyrǵan. Bul joly solai bolǵan. Bastysy, «ainalymdaǵy qarajatty tolyqtyrýǵa» dep berilgen nesielerdiń eshqaisysy bankke qaitarylmaǵan.
«Arada eki ai ýaqyt ótkende «Liter M» JShS-niń qarjylandyrý shegi 22,5 million AQSh dollaryna deiin kóbeitilgen. Buǵan kepil retinde «Montajinjiniring» jaýapkershiligi shekteýli seriktestiginiń jarǵylyq qorynyń 75 paiyzdyq úlesi qoiylýy kerek bolǵan»,- dep jalǵastyrdy sózin Talǵat Amantai. Túptep kelgende, «Montajinjiniring» jaýapkershiligi shekteýli seriktestiginiń jarǵylyq qorynyń 75 paiyzdyq úlesin M. Ábiliazovtyń baqylaýyndaǵy «Liter I» jaýapkershiligi shekteýli seriktestigi ózine menshikteidi. Sońǵy kompaniia M. Ábiliazovtyń kúzetshisiniń atyna tirkeledi. Bul jerde «Montajinjiniringtiń» Almaty qalasyndaǵy Abai jáne Fýrmanov kósheleriniń qiylysyndaǵy quny qymbat jyljymaityn múlik kepilge qoiylýy tiis bolǵan.
Alaida, saiyp kelgende ne «Liter M» JShS-iniń, ne «Liter I» JShS-iniń tarapynan BTA bankke eshqandai kepildik qoiylmaǵan. Bankten berilgen nesie qaitarylmaǵan, tipti ony eshkim de qaitarýǵa niet tanytpaǵan.
«Stroigrýpp LTD» jaýapkershiligi shekteýli seriktestigine de osyndai kestemen nesie berilgen. Aita ketelik, bul kompaniianyń aktsiiasynyń 80 paiyzdyq úlesi Muhtar Ábiliazovtiń sybailastarynyń biri banktiń burynǵy basqarýshy direktory, sottalýshy Qairat Sadyqovtyń atyna tirkelipti. Sot otyrysynda sotqa túsinik bergen Sadyqov atalǵan kompaniianyń nominaldy qojaiyny bolǵanyn, biraq eshqandai máselelerdi sheshýmen ainalyspaǵanyn aitty. BTA banktiń nesie komiteti ótinishti ózi tirkep, «Stroigrýpp LTD» JShS-ne 45 million AQSh dollary kólemindegi kepilsiz nesieni aýdarady. Túptep kelgende, bul nesie de bankke qaitarylmaǵan.
