Búgin QR Mádeniet jáne sport ministri Arystanbek Muhamediuly «Tulǵalyq ósý treningi» («Trening lichnostnogo rosta») filminiń rejisseri Farhat Sháripovpen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
Kezdesý barysynda Arystanbek Muhamediuly film rejisseri Farhat Sháripovti Halyqaralyq Máskeý kinofestivalindegi jeńisimen quttyqtady.
«Bul - bizdiń óner salasy úshin, jalpy alǵanda Qazaqstan úshin jarqyn oqiǵa. Halyqaralyq Máskeý kinofestivali - tarihy bai, álemdegi eń eski festivalderdiń biri ári jyl ótken saiyn tanymaldylyqqa ie bolyp kele jatyr» - dep atap ótti ministr.
Kezdesý barysynda Farhat Sháripov mádeniet jáne sport ministrligine alǵys bildirip, jaqynda ótken kinofestival jaily áserimen bólisti. Sondai-aq, aldaǵy josparlary týraly sóz qozǵady.
Esterińizge salsaq, rejisser Farhat Sháripovtyń «Tulǵalyq ósý treningi» filmi Máskeý kinofestivalinde Gran-prige ie bolǵan edi. Kartinany QR Mádeniet jáne sport ministrliginiń tapsyrysymen Sh. Aimanov atyndaǵy «Qazaqfilm» kinostýdiiasy túsirgen. Filmniń stsenarii Daniiar Súgiralinovtyń «Kirpichi 2.0» romanynyń negizinde jazylǵan. «Úzdik film» nominatsiiasyndaǵy «Altyn Georgiidi» Sháripovke halyqaralyq qazylar alqasynyń tóraǵasy, tanymal koreialyq rejisser Kim Ki Dýk tabystady.
Áleýmettik drama qyryq jasqa kelgen, orta jas kúizelisin keship júrgen bank qyzmetkeri Qanat týraly baiandaidy. Birde Qanat tulǵalyq qalyptasý, kóshbasshylyq qasietterdi damytý treningine barady. Koých-trener jetistikke qalai jetý kerektigin jáne kóshbasshy bola bilýdiń ádisterin aitady. Kóshbasshy bolýdyń qupiialaryn boiyna sińire kele, Qanat ózin jáne ómirge degen kózqarasyn ózgertýge bekinedi.
«Filmniń jaryqqa shyǵýyna yqpal etken barsha adamǵa alǵys aitamyn. Aldymen otbasyma myń alǵys. Sol sebepti bul jeńisimdi ákeme arnaimyn. Al festival uiymdastyrýshylary men kórermenderine kóp rahmet», - dedi MHKF laýreaty Farhat Sháripov aǵynan jarylyp.
Filmniń álemdik tusaýkeseri 23-shi Pýsan Halyqaralyq kinofestivalinde ótken. Kartinanyń qorjynynda budan basqa taǵy eki birdei júlde bar - 14-shi Halyqaralyq Sháken Aimanov kinofestivalindegi Qazylar alqasynyń arnaiy júldesi jáne Netpak júldesi.
