Jýyrda Qazaqstan ulttyq mýzeiiniń direktory bolyp taǵaiyndalǵan eks-ministr Arystanbek Muhamediuly qazirgi jalaqysy qansha ekenin aitty, dep habarlaidy "Ult aqparat".
Muhamediuly ulttyq mýzei direktorynyń jalaqysy 3 milllion teńge dep jalǵan aqparat taratqandarǵa jaýap berdi.
"Dostarym, jalaqymnyń qansha bolatyny áli ózime de belgisiz bolyp turǵanda, ol týraly jalǵan aqparat tarap ketti. 3 000 000 teńge kólemindegi eńbekaqy – jalǵan. Mundai shyndyqqa janaspaityn aqparat taratý kimge paida ákeletinin bilmeimin, fake news qoldan jasalǵanyna kúmánim joq. Tym ásire siltepti, basqa ne aitýǵa bolady", - dep jazdy ol instagramdaǵy paraqshasynda.
Muhamediuly ministr bolǵan tusta, mádeniet salasy qyzmetkerleriniń jalaqysyn kóterý máselesin birneshe ret kótergenin atap ótti. Osy oraida ol úkimette istegen jyldary qansha alǵanyn jáne qazirgi eńbekaqysy týraly ashyq aitty.
"Eger osyndai aqparat shyndyqqa janassa, árine qýanar edim, ókinishke qarai, bul ázirge múmkin emes. Ádettegidei sizderge shynymdy aitaiyn: ministr qyzmetin atqarǵanda eńbekaqym 980 000 boldy... Ulttyq mýzei direktory retinde 172 436 teńge eseptelip, qolyma 139 673 teńge beriletin bolady. Bul qyzmettegi meniń sanatym "A1-1", eńbek ótilim mamyr aiyn qosa alǵanda 31 jyl úsh ai boldy", - dedi ulttyq mýzeidiń jańa direktory.
Eks-ministr jalaqy tóńiregindegi jalǵan aqparatqa ýaqyt ketirgisi kelmeitinin aityp, taqyrypty jabýdy ótindi.
"Sonymen, dostarym, ne shyqty? Naǵyz feik. Jalǵan aqparatta meniń ailyq jalaqym retinde kórsetilgen soma meniń eńbekaqymdy 95%-ke kóbeitip, men 12 aida alatyn 1 676 076 teńgeni eki esege arttyrypty. Bizde "on úshinshi eńbekaqy", bonýstar joq. "Kezdeisoq" milliondarǵa qatelesip ketipti... Mundai jalǵan aqparatqa sengen adamdar tabylyp, olarǵa túsinik berýim kúlkili jaǵdai. Osymen bul taqyrypty talqylaýdy doǵaraiyq, aǵaiyn. Mundai usaq-túiekke ýaqytymdy endi ketirmeimin: aqyldylar ózderi túsinedi, aqymaqtarǵa túsindire almaisyń. Barshańyzǵa jaqsy kóńil-kúi úshin raqmet!", - dep jazǵan Muhamediuly.
Aita ketsek, jýyrda burynǵy mádeniet jáne sport ministri Arystanbek Muhamediuly Qazaqstan Ulttyq mýzeiiniń direktory qyzmetine taǵaiyndaldy.
Ulttyq mýzeidi buǵan deiin Almaz Nurazhan basqarǵan bolatyn.
