QR Mádeniet jáne sport ministri Arystanbek Muhamediuly elordanyń «Etnoaýyl» jerindegi kúii ketken tazylarǵa qatysty máseleni óz baqylaýyna aldy. Bul týraly ministr óziniń Feisbýk paraqshasynda jazdy.
Aita ketsek, budan buryn áleýmettik jelini qoldanýshylardyń biri Jora Morozov óz paraqshasynda kúii ketken itterdiń videosyn salǵan bolatyn. Qoldanýshynyń aitýynsha, ol videony «Qazanat» atshabary jaqta túsirgen.
Arystanbek Muhamediuly atalǵan «Etnoaýyl» ulttyq-mádeni ortalyǵy aýmaǵynda («Qazanat» ippodromy) eki tazynyń jaǵdaiy týraly búgin túnde kórgenin aitady.
«Tańnan bastap jaǵdaidy anyqtaýǵa kiristim. Mekeme balansynda birde-bir it joq. Itter turǵan qamaýlar «Etnoaýyl» aimaǵyndaǵy sharalarǵa qatysatyn syrttan ákeletin janýarlarǵa arnalǵan. Eki ittiń de iesi - Bekbolat esimdi jeke tulǵa, olardy Pavlodardan ákelipti. Onyń aitýynsha, biraz ýaqyt buryn eki it qorshaýdan joǵalyp ketip, 10 kún izdestirýden keiin óte nashar jaǵdaida qaitarylypty. Itter joǵalǵany týraly politsiiaǵa bergen aryzy bar», - dep jazady ministr.
Arystanbek Muhamediulynyń nusqaýymen eki it te Astananyń veterinarlyq klinikasynda tolyq meditsinalyq zertteýden ótip, qajetti em qabyldaityn bolady.
«Veterinarlardyń qorytyndysy boiynsha, janýarlardyń jaǵdaiy qanaǵattanarlyq: tazy standartqa sáikes aryq bolýy kerek. Biz itterdi istiń mán-jaiyn anyqtaǵansha sol jerde qaldyrý qajet dep sheshtik. Ishki qyzmettik tekserý bastaldy. Kináliler mindetti túrde jazalanatyn bolady. Itterdiń qojaiynymen kelisimshartty buzý týraly jáne Jora Morozovtyń operatsiiaǵa jumsalǵan qarjysyn ustap qalý týraly sheshim qabyldandy», - deidi Arystanbek Muhamediuly.
Ministr tazylar týraly jazba avtoryna janýarǵa degen meiirimi men adamgershiligi úshin alǵys bildirdi.
«Janýarlarǵa mundai qarym-qatynasqa jol bermeýimiz kerek. Biraq itterdiń iesi bar ekenin eskerip, onyń jekemenshigin tartyp ala almaimyz. Qajet bolsa, quqyq qorǵaý uiymdaryna júginemiz. Eger qojaiynynan itterdi alatyn bolsa, «Etnoaýyl» olardy óz sapyna qabyldap, qaýipsiz jáne jaily ómir súrýlerine jaǵdai jasaýǵa daiyn», - deidi ministr.
