QR mádeniet jáne sport ministri Arystanbek Muhamediuly Dimashtyń kontsertinde janjal shyǵarǵandar jumystan qýylǵanyn aitty, - dep habarlaidy kaz.tengrinews.kz.
"Dostarym, keshe Qytaidaǵy I am a singer degen abyroily telekonkýrsta keremet óner kórsetken daryndy jas ánshimiz Dimash Qudaibergendi ulyqtadyq. Dimashty súietinderge, jankúier bolǵandarǵa shyn júregimizben merekelik syilyq jasaýǵa tyrystyq. "Qazaqstan" OKZ esikterin tegin aiqara ashtyq jáne zor qýanyshpen qalaǵan adamdy kontsertke shaqyrdyq. Dimash Qudaibergen keshe keremet kontsert ótkizdi, ol ata-anasymen birge án aityp, jeńisin Atasy men Apasyna arnady", - dedi ministr.
Sondai-aq, ministr ýaqyt taýyp, Dimashty kórýge niet bildirgen, qoshemettep, qoldaǵandardyń barlyǵyna alǵysyn bildirdi. "Ýaqytynyń tyǵyzdyǵyna jáne ushyp kelip, sharshaǵanyna qaramastan, barlyq jankúieri men tyńdarmanyna Qytaida alǵys aitýǵa asyǵyp, týǵan elinde tuńǵysh kontsertin bergeni úshin Dimashtyń ózine kóp raqmet aitamyn!", - dedi Arystanbek Muhamediuly.
Óz kezeginde ministr bolǵan oqiǵaǵa qatysty pikirin bildirdi. "Bolǵan oqiǵa jaily. Ókinish bildiremin. Eshkimniń de basqa adamdardyń bostandyǵyna shekteý qoiýǵa quqyǵy joq, olardyń ishinde men qurmetpen qaraityn jýrnalisterdiń de. Kúzet qyzmetkerleriniń mundai áreketteriniń durys emestigi sózsiz. Men tańerteń osy janjalda bolǵan adamdarǵa qatysty qatań sharalardy qoldanýdy tapsyrdym", - dep aityp ótti ministr.
Ministrdiń aitýynsha, "Qazaqstan" OKZ basshylyǵy qazirgi ýaqytta olardy qyzmetterinen bosatty.
"Munyń biz úshin EXPO-2017 kórmesin ótkizýdiń aldynda bir qorytyndyǵa kelýimizge sebep bolatyny sózsiz. Uiymdastyrý máselesine keletin bolsaq, biz endigide mundai jaǵdailar qaitalanbas úshin sharalardy kúsheitemiz, al bolashaqta Dimashtyń kontsertterin ótkizetin kezde syiymdylyǵy úlkenirek alańdardy qarastyratyn bolamyz", - dedi Muhamediuly.
Sondai-aq, ministr "Informbiýro" basylymymen bolǵan oqiǵaǵa toqtalyp ótti.
"Endi "Informbiýroǵa" bergen "pikirim" týraly aitatyn bolsaq. Osy jaǵdaiǵa qatysty taǵy bir túsinik bergim keledi. Jýrnalisterdiń eshqaisysy - "Informbiýro" da, basqa BAQ-tar da maǵan habarlasqan joq. Dimashtyń kontsertinen keiin men Beibitshilik pen kelisim saraiynda ótetin kontsertke daiyndalýǵa kettim. Onda tún jarymǵa deiin boldym, jýrnalisterden eshqandai da qońyraý túsken joq. "Informbiýro" basshylyǵy maǵan osy qatelikke qatysty keshirim surap, aitylǵan "pikirdi" joqqa shyǵardy", - dedi mádeniet jáne sport ministri.
Eske sala keteiik, osyǵan deiin ishki ister ministri Qalmuhanbet Qasymov "Qazaqstan" OKZ ǵimaratynda jýrnalister men kúzetshiler arasynda bolǵan janjaldy shyǵarǵan kinálilerdi anyqtaitynyn málimdegen edi.
