Búgin Úkimet saǵatynda QR Mádeniet jáne sport ministri Arystanbek Muhamediuly óner jáne mádeniet qyzmetkerleriniń eńbekaqysy jaily aityp berdi, dep habarlaidy Baq.kz tilshisi.
Jiynda Májilis depýtaty Qýanysh Sultanov ministrden «óner, mádeniet eńbekkerleriniń eńbekaqysyn tóleý júiesine túbegeili reforma qajet dep oilaisyz ba?» dep surady.
«Qazir bizde óner salasyndaǵy jalaqy óte tómen deńgeide. Degenmen, ózderińiz de kórip otyrsyzdar, bizdi - óner adamdaryn eshkim erkeletip otyrǵan joq. «Ash adam shyǵarmashylyq shyńyna jetedi» degen pikir bar. Oǵan Bethoven, Motsart pen taǵy basqalar mysalǵa keltiriledi. Bul tulǵalar kedei tursa da, uly shyǵarmalardy ómirge ákelgen. Qarjygerler durys aitatyn shyǵar. Az qarjylandyrý kólemine qaramastan bizdiń talanttar halyqaralyq deńgeide tanylyp jatyr. Degenmen, árine joǵary deńgeidegi ártister jetistikterge óz talantymen jetedi. Al kitahana, mýzei men mádeniet úileri siiaqty osal salalar qarjylandyrýdy talap etedi», - dedi Muhamediuly.
Al Qarjy vitse-ministri Tatiana Saveleva 2005-2011 jyldar aralyǵynda mádeniet qyzmetkerleriniń eńbekaqysy 5 ret ulǵaitylǵanyn aitty.
«Ár ósirgen saiyn jalaqy 25-30 paiyzǵa ulǵaityldy. Sońǵy ret eńbekaqy 2016 jyly kóterildi. Ol kezde Eńbek jáne halyqty áleýmettik qorǵaý ministrligi jalaqy tóleýdiń jańa júiesin engizgen bolatyn. Bunda mádeniet qyzmetkerleri eńbekaqysynyń densaýlyq saqtaý jáne bilim berý salalarynan az ekendigi eskerilip, 40 paiyzǵa ulǵaityldy», - dedi Saveleva.
Al Eńbek jáne halyqty áleýmettik qorǵaý vitse-ministri Svetlana Jaqypovanyń málimetinshe, eń osal salalarǵa kitaphanashylar men muraǵatshylar jatady. Búgingi kúni kitaphanashylardyń jalaqysy 50 myń teńgeden 70 myń teńgege kóterilse, muraǵatshylar jalaqysy 44 myń teńgeden 62 myń teńgege ulǵaitylǵan.
