Abaidyń «Jidebai-Bórili» memlekettik tarihi-mádeni jáne ádebi memorialdyq qoryq-mýzeii muraǵatynda jinaqtalǵan gazet-jýrnal tigindilerin aqtarý ústinde uly aqyn Muqaǵalidyń «Dala danyshpany» degen óleńi kózge ottai basyldy! Bizdiń bilýimizshe, bul óleń Muqaǵalidyń jyr jinaqtarynda buryn-sońdy jariialanbaǵan.
Sondyqtan qazaqtyń XIX ǵasyrda ómir súrgen uly aqynyna arnalǵan XX ǵasyrda ǵumyr keshken taǵy bir uly aqynynyń erekshe qurmet pen maqtanysh sezimi tunǵan óleńin jariialaýǵa asyqtyq.
Dala danyshpany
Dala jatyr – ón boiy tunǵan óleń,
Abai, mine, japanda turǵan emen.
Ata sózi terbetken besigimdi,
Ata sózin ómirde tyńdap ólem.
...Uly emes Abai jalǵyz saharanyń,
(Men emes, solai degen Atalarym).
Sol urandy urpaqqa aparamyn,
Men qazaq – Abai bolyp atanamyn.
Ýh, dala!
Dala tolǵan kól-kósir jyr,
Dala – qobyz tutpaidy pernesin kir.
Tiri Abaidy áldile, darhan dalam,
Óleń seli óńirdi terbesin bir.
Dala, dala...
Sal – dala seleýlegen,
Jyrmen uiyqtap, oianǵan óleńmenen.
Dala degen – kúi sandyq bul qazaqqa,
Abai dese qulaǵy eleńdegen.
Jyldar, jyldar...
Qanshama alystadyq,
Qanshama ózen ózgertti aǵystaryn.
Ýaqyt ozdy, sen biraq qalyspadyń,
Ýa, armysyń, arysym, danyshpanym!
Muqaǵali Maqataev.
"Qazaq ádebieti", 13 tamyz, 1965j.
Abaidyń «Jidebai-Bórili» memlekettik
qoryq-mýzeiiniń baspasóz qyzmeti
